U myntri Iew, ki pulit Syiem, kim don jingtip seh? ong ka KHNAM

Shillong,12 Risaw:
Ka jingkyntait ka Hima Mylliem ba ka lum khajna bai sar iew na ki paidbah nongshong iew ka la pynlyngngoh ym tang ia ki nongshongiew hynrei ka la pynlyngngoh ruh ia ka KHNAM, “Hato ka hima Mylliem naduh u myntri ba peit ia ka iew, ki pulit syiem kiba iaid pahara ia ka iew, kim don jingtip mo ia katei ka jingkhrong pisa, ki nonglum pisa ki wan lum ha ka kyrteng jongno? Lada ka dei kumtei ka dei ka jinglum be-aiñ, dei ban kem ia ki nongwan lum” ong u President jong ka KHNAM state Youth Wing u bah Thomas Passah haba ia kren bad u Rupang.
Lah ban pynkynmaw ba tang mar ia iohsngew ia ki jingkren u myntri ba peit ia ka iew u myntri C.Kharkongor uba la kren ha ka jingialang kaba la long mynhynnin ka sngi ha Iewduh, brum ki nongshong iew ki ia lum bad ki la shim syndon da ka rai ba kin ym siew khajna sar iew shuh naduh mynta ka taiew, halor katei ka bynta u President ka KHNAM SYW, u la ong ba ka rai ki nongshong iew ka long kaba dei eh bad ki dei ban kem ruh ia ki briew kiba wan lum ia kitei ki khajna kiba khlem ka jingtip ka bor Hima bad kaba khlem da ai slip ruh hadien ba la kner ia ka pisa.
Ha kaba ia dei bad ka jingwan u CEM mynhynin ka sngi ha Iewduh, ka KHNAM ka la ong ba na ka por sha ka por ki nongwan jngoh ki la wan shaid shi shaid ha Iewduh hynrei haduh mynta ym pat don jingkylla , lah ruh ban kdew ba ki bor ka District Council lei la kumba saw ne san sien ki la wan peit ia ka Iewduh hynrei ym don jingkylla bad ki bun sa tang ki jingthoh, ym pat iohi kam eiei. Ha kaba ia dei bad kane u bah Thomas Passah u la ong ba ka KHNAM ka kwah ba da ka jingwan hi u CEM mynhynin ka sngi kan wanrah jingkylla ha Iewduh.
Haba la kylli hato katno por kan shim por ban wanrah jingkylla ha Iewduh, u bah Passah u la ong “Lada don shisha ka mon ban leh bad lada don ka jingkitkhlieh, tang shi taiew lah iohi ia ki kam”.
U bah Passah u kwah ba mynta ka kynti ka District council kan pyni noh da ki kam ha Iewduh ym shuh ban shu ia iaid sawari ia ka iew ryngkat ki ksing ki dhah bad ki tangmuri. “Kiba ia leit ia wan ki la bun, hynrei ym pat iohi pat tang iwei i kam iba rit eh ruh” pynkut u bah Passah ha ka jingiakren bad u Rupang.