“U Mynsiem halor ka doh baroh”

AIS Suja

U Mynsiem, halor ka doh baroh. U Mynsiem u long ka jingim, khlem
mynsiem ym don jingim. Hangne ngim kren shaphang ka mynsiem (Soul) hynrei shaphang u Mynsiem (Spirit) uba na u Blei bad u long hi u Blei.
U Joel, u la dep iathuhlypa ia ka por ba yn theh ia u Mynsiem halor ka doh baroh. Joel 2:28-29. Ka jingiathuhlypa u Joel, ka la long bun bun spah snem hadien ba u Jisu u la kiew noh sha bneng ha u lyoh. Ki kam ki Apostol 1:9.
Ha shuwa ba u Jisu un kiew sha bneng, u Jisu ula dep kular ban phah da uwei pat ha ka jaka jong u, uta u dei u Mynsiem Bakhuid. “U Mynsiem Bakhuid ia uba uta u Kpa (Blei) un phah ha ka kyrteng jong nga (kyrteng u Jisu), uta un hikai ia phi ia kiei kiei baroh”. Ioannis 14:26.
Kumta ha ka sngi Pentekos, u Mynsiem u la hiar na bneng kum ka lyer ba beh kyrthep ……. la pyndap ia ki da u Mynsiem Bakhuid, ki ia kren ha ki thylliej (speaking in tongues) katkum ba u Mynsiem u ai bor ia ki ban kren. Ki kam Apostol 1:1-4. Bad ngi tip ba kaba kren ne duwai ha ki thylliej ka long kaba donbor namar ki ksuid bad u soitan kim sngewthuh lait noh tang u Blei hi.
Da ka jingtrei u Mynsiem Bakhuid, ki briew ki iakren ha ki thylliej (speaking in tongues). Kiwei ki kren bein da kaba ong – “Ki la kdang wain thymmai”. Ki Kam Apostol 2:12. Haba u Petros u ialap ha Judia bad Jerusalem, u ong, kine kim ia buaid kumba tharai ma phi. Hynrei kane ka long kata kaba la dep iathuhlypa da u Apostol un theh na u Mynsiem jong u halor ka doh baroh” ki kam Apostol 2:14-16.
Kiwei kin iathuhlypa, kiwei kin iohi jingithuhpaw, kiwei kin phohsniew jing phohsniew. Ngan theh noh na u Mynsiem jong nga, bad kin iathuhlypa (prophesy)” ki kam Apostol 2:17-18.
Kane ka la jia ha kito ki por bad ka long ka jingsdang ka jingtrei u Mynsiem Bakhuid. Don kiba ong ba kane ka jia tang ha kito ki por, bad mynta ym don shuh kata ka jingtrei u Mynsiem ba kum kata, kane ka jingong ka long kaba bakla bad pynbakla ia kiwei pat. Hynrei to tip ba naduh ka sngi Pentekost ka long ka jingsdang (starting) jong u Mynsiem Bakhuid ban trei, bad kane ka jingkular ka dang im ka dang treikam haduh mynta. Lada u briew u mon bad shah ba u Mynsiem Bakhuid un trei ha ka jingim jong u bad jong uwei pa uwei.
Ki jingiathuhlypa, jingithuhpaw, bad phohsniew ki jingphohsniew ki la sdang naduh ka Pentecost ki dang iaid haduh mynta katba u Mynsiem Bakhuid u dang trei mynta ha sawdong pyrthei. Ym pat shim noh ia u Mynsiem Bakhuid jong u Blei, u Mynsiem u dang trei mynta hynrei ka sah ha u briew marwei la un ai jaka ne em ia u Mynsiem Bakhuid ban trei ne un ai jaka ia u soitan ba un trei ha ka dohnud jong u. wat sngewthuh bakla da kaba ong ba u Mynsiem Bakhuid um trei shuh, hynrei to tip u trei jur mynta ruh. Haduh mynta, don kiba iathuhlypa (Prophesy) don kiba ithuhpaw (Vision), don kiba phohsniew ki jingphohsniew (dream a dreams). Don ki briew ba u Blei u pyndonkam ban iathuhlypa ia kaei ban sa jia bad kiba iathuh wat ia ka jinglong jingman u briew da ka bor u Mynsiem Bakhuid, don kiba ithuhpaw ia kiei kiei kiba jia ki ban sa jia ruh, don kiba phohsniew jingphohsniew da kaba ki sngew ba u Blei u kren ia kaei kaba u dei ban kren ne pynpaw katkum ka ktien jong u.
U Mynsiem Bakhuid u dap ia ka pyrthei kumba ki um ki tap ia ka duriaw (Holy Spirit is Omnipresent, as the waters covers the sea). Kumta ym lah ban ong ba ym don shuh ka jingiathuhlypa lane ym don jingithuhpaw lane jingphohsniew ki jingphohsniew. Lada kata kam don ka pyni ba u Mynsiem Bakhuid um don shuh hangne ha pyrthei. Lada u Mynsiem Bakhuid la shim noh ia u yn wan u soitan ban synshar hangne hi ha pyrthei. Namar kan poi ka por ha kaba u Blei un shim noh ia u Mynsiem Bakhuid nangne na pyrthei ha shwa ba u Jisu un synshar 1000 snem.
Kumta to ngeit kane ka jingngeit ba u Mynsiem Bakhuid u trei kylleng mynta ha ki briew don kiba iathuhlypa (Prophesy) don kiba ioh ithuhpaw (Vision) don kiba da ki jingphohsniew ki iohi ia u Blei ba u kren, kane ka long katkum ka ktien jong u kaba im bad kaba dang im haduh mynta sha ki bymjukut.
Haduh mynta, mynta kein, lada uno uno baroh un khot krpad ia u Trai Jisu” yn pynim ia u. ki kam Apostol 2:21. Ka daw ka long ba u Mynsiem Bakhuid u dang trei. Namar une u Mynsiem Bakhuid u long na u Blei. “U Mynsiem Bakhuid ia uba la phah sha ka pyrthei ha ka kyrteng u Jisu” Ioannis 14:26. Kumta hap ban khot kyrpad ha ka kyrteng u Jisu namar ka long ka kyrteng halor ki kyrteng baroh.
U Blei um pat khang ia u Mynsiem Bakhuid, kumta haduh mynta, don kiba IATHUHLYPA, don kiba ioh ITHUHPAW, don kiba PHOHSNIEW KI JINGPHOHSNIEW, kata katkum ba u Mynsiem Bakhuid u ai ha ki.
U briew u lah ban klet ia u briew, hynrei u Blei um ju klet ia u briew bad une u Mynsiem Bakhuid jong u Blei u iai tied ia ka jingkhang ka dohnud u briew ban ioh thaw thymmai (renew) ia u. U Mynsiem Bakhuid u iai khot sha ka jingkylla bamut. “Mynta u Mynsiem u Blei u hukum ia ki briew kylleng la kylleng ban kylla kaba mut. Balei? Namar u la buh ka sngi ba un sa bishar ia ka pyrthei” ki kam Apostol 17:30-31. Na kata ka daw, u Blei u dang iai theh ia u Mynsiem Bakhuid halor ka doh baroh mynta. Kumta naduh ka sngi Pentecost haduh mynta naduh ba u Jisu u la kiew sha bneng ha u lyoh, u Mynsiem u dang trei ha u briew bad lada uno uno u pyneh dohnud, ka dujok ding ka ap ia u.
Kumta uno uno uba kren bein ia u Khun u briew (Jisu); ia uta lah ban mab: Hynrei uba kren bein (kyntait) ia u Mynsiem Bakhuid yn ym mab ia u ha kane ka pyrthei (ba mynta) lymne ha kata ka ban sa wan” Mathaios 12:32. (Kata ka ban sa wan ha ka 1000 snem ka pyrthei thymmai kein). Amen.