“U MYNSIEM BAKHUID, U LONG U TYLLONG JONG KA BOR”

Dr. B.R. Marpna

U Mynsiem Bakhuid U dei U tyllong jong ka bor ha ka jingim jong uba ngeit namar lada khlem ka bor jong U, ngin nym lah ban leh ia kaei kaba ngi kwah khamtam ban im ka jingim kaba pynsngewbha ia U Blei. U dang iai trei haduh kine ki sngi ban aibor ia ngi khnang ba ngin lah ban im ka jingim jong ka jingjop ha ka jingiaid lynti jong ngi kum ki khun ki jong U Blei. Kumba long U Kpa bad U Khun, U Mynsiem Bakhuid ruh U dei Uba trei bad don ia ka jinglong Blei namar kumba ki long lai ha Uwei U Blei (Trinity). U Kpa Uba long U Nongthaw bad U Khun Uba long U Nongpynim bad Nongsiewspah, kumta ruh U Mynsiem Bakhuid Uba long U Nongpynkhuid (Sanctifier) bad Nonpyllaitluid bad ban ialam ia ngi ha ka jingim kaba thymmai. “Te U Trai u long uta U Mynsiem, bad ha kaba don U Mynsiem U Trai, hangta don ka jinglaitluid” (2 Korinth 3:17).

U Mynsiem Bakhuid U hikai, pynshlur, pyntngen, iasaid na ka bynta jong ngi bad ialam ruh ia ngi sha ka jingshisha baroh. U Mynsiem Bakhuid U im bad don ryngkat bad U Jisu bad aibor ia U mynba U Jisu U dang don ha kane ka pyrthei (Ministry). Hadien ba U Jisu U la kiew sha bneng, U la phah ia U Mynsiem ban iaisah junom ha ka dohnud jong ngi bad U iaisah ha ka Balang bad kumjuh ha ka jingim shimet jong kiba ngeit. Ka bynta jong U ban trei ka long ban ai mynsiem ia ki Nongiathuhlypa bad ha ki Apostol bad ban pynskhem ha ka dohnud jong ki briew ia kaei kaba U Blei U kren ha ka ban thoh ia ka ka Ktien jong U Blei (Authors). U ialam ia ngi sha ka jingkha kaba kynja mynsiem (Spiritual Rebirth) bad wallam ia jingdon jong U Khrist (Christ’s Presence) sha ngi. U pynjan ia ngi sha U Blei (In Touch With God) bad ai ruh ia ngi ka bor ban sakhi (Witness) bad ban im ka jingim Khristian kaba long jingkyrkhu da kaba ai ruh ia ngi ia ki jingai (Gifts) katkum ka jingai jong U. U trei ha ki rukom kiba pher bapher bad kumba la batai haneng.

U ai bor ban iathuhlypa: “Bad U Mynsiem U Trai un wan jur ha me, bad ma me hi ruh men iathuhlypa lem bad ki, bad yn pynkylla kum uwei pat u briew ia me” (1 Samuel 10:6)

U shongsah ryngkat: “Bad u Mynsiem jong U Trai un shongsah halor jong u, u mynsiem ka jingstad bad ka jingshemphang, u mynsiem ka jingsylla bad ka bor, u mynsiem jong ka jingtip bad ka jingsheptieng ia U Trai” (Isaiah 11:2)

U Pynrem ia ka pop: “Hynrei ma nga shisha da u Mynsiem U Trai nga dap ka bor, bad ka jingbishar, bad ka jingkhlain, ia ka ban iathuh ha u Jakob ia ka jingpalat jong u, bad ha u Israel ia ka pop jong u” (Mikah 3:8)

U ai ka bor ia ki jingeh: Ynda kumta u la iathuh bad u la kren, u da ong, Kane ka long ka ktien U Trai ha U Serubbabel, ka da ong, Ym da u paidiapom, lymne da ka bor, hynrei da u Mynsiem jong nga, ong U Trai ki paid” (Sekharaiah 4:6)

U kyntiew bad rah ia ka nam jong U Trai: “Ynda kumta U Jisu u la wan phai pat ha ka bor U Mynsiem sha Galilaia: te ka nam shaphang jong u ka la phriang baroh sawdong kata ka ri” (Loukas 4:14)

U ai bor ban phla: “Hynrei phin ioh diang ia ka bor, ynda la wan U Mynsiem Bakhuid ha phi: ba phin long ki nongphla ia nga ha Jerusalem, bad ha Judia baroh bad ha Samaria bad haduh bakut ka pyrthei” (Ki Kam Ki Apostol 1:8)

U pynkhlain ia u briew bashapoh: “Ba un ai ha phi, katba kum kata ka jingkynrei spah ka burom jong u, ba yn pynkhlain ia phi bad ka bor da U Mynsiem jong u ha u briew bashapoh” (Ephesos 3:16)

U weng lut ia ki jingsheptieng: “Namar U Blei um shym la ai ha ngi ka mynsiem ka jingsheptieng; hynrei ka jong ka bor, bad ka jong ka jingieit, bad ka jingleh adkar” (2 Timothi 1:7)

U Blei Un kyrkhu, Amen.