Shillong,10 Nailar:
Ka saiñpyrthei ha-poh ka seng Congress ka la nang iai khih phaloh katba nangmih ki sngi ha kaba kawei ka kynhun ka la kob ba shen ka shuki u myntri rangbah ka jylla u Dr.Mukul Sangma kan sa khyllem noh ha kine ki sngi katba na kawei pat ka kynhun kaba don ha ka liang u Dr.Mukul ka da kren sngew skhem ba u u Dr.Mukul un dang iaineh kum u myntri rangbah haduh ba kut ka samoi treikam jong u.
U nongthohkhubor u la ioh ban ia kren ruh bad katto katne ngut ki nongialam ka seng Congress ha kane ka jylla ki bym shym dei ki nong-mihkhmat paidbah hynrei ki dei ki nongtrei ba shitrhem ka seng Congress kiba bat ia ki kam ba kham hakhmat hapoh katei ka seng ki la ong ba watla ka la don ka jingtynruh kaba khah khah sha Delhi da ka kynhun kaba pyrshah ia u myntri rangbah , hynrei ka shem jingeh pat ban pynmih ia ka rai naba kiba bun ki MLA ki kyrshan ia u Dr.Mukul.
Haba la kylli bniah na ki haduh kumba ngut eiei ki MLA kiba kyrshan ia u Dr.Mukul , ki nongialam katei ka seng ki la ong ba kim tip haduh katno ngut hynrei ki la ong ba na ki 30 ngut ki MLA Congress kham bun na ki kiba kyrshan ia u Dr.Mukul bad kiba pyrshah ki don tang khyndiat ngut. Ki la ong ba lada ka sainpyrthei kumba mynta kam don don jingkylla ki la thikna beit ba u Dr.Mukul un dang neh haduh ba kut ka san snem jong u.
Phi don ban ong eiei?