U Mukul, ka Kong Roshan, Ampareen bad u Bah Hek, ki leit jngoh pandal Puja

Shillong, 22 Risaw:
Lai ngut ki myntri sorkar kila synran lang ia u Myntri rangbah ka jylla ha ka jingleit jngoh jongu ia ki jaka mane puja ha ka nongbah ha kane ka sngi Palei.
U Myntri Rangbah u Dr Mukul Sangma uba jngoh ia ka jaka lehkmen puja ha RR Colony hynne ka sngi la synran lang ka myntri kam pohiing ka kong Roshan Warjri, myntri sor Kong Ampareen Lyngdoh, bad u Myntri ka koit ka khiah u Bah AL Hek nalor u Parliamentary secretary u Samuel M Sangma.
Ha kane ka jingleit jngoh, u Myntri Rangbah u la sam khusnam ruh sha ki nongjop ha ka jing iakob tem ka Central Puja Committee (CPC) ha  R R Colony Durga Puja Committee.
Ka jinglehkmen Puja jong ki riew ngeit Hindu kala sdang naduh kane ka sngi Nyngkong bad kan kut lashai ka sngi Thohdieng ha kaba kin leit bret ia ki blei thaw jongki ha pung ka wah umkhrah ha Polo.
Ki don haduh 72 tylli eiei ki pandal puja ha kane ka jylla mynta u snem bad kaba bun tam ka dei ha East Khasi Hills bad ha ka nongbah Shillong.
Ha ka sngi sdang ka puja, ka CPC ka la pynlong ia ka jingialum lang jong baroh ki jait niam ha kane ka nongbah ha Namghar ha Laban ba la don lang u Lat ka jylla u V Shanmuganathan nalor ki nongialam niam bapher bapher kiba don ha kane ka nongbah naduh ki Muslim, Seng Khasi, Khristan, Sikh bad Buddhist nalor kiwei pat.