Shillong: 3 ngut ki kyrtong ka HSPDP ki la wan ban thep kyrteng myn hynnin ka sngi na ka bynta ban ia khun ia ka elekshon MDC 2019 ka ban long ha ka 27 tarik mynta u bnai. Kitei ki 3 ngut ki kyrtong ki long u bah Sherbor Mawlong na Nongspung-Sohiong, u bah K Warjri na Mawphlang-Diengiei bad u bah Gilbert Laloo na Mylliem konstitwensi. La synran ia kitei ki kyrtong da u nongialam ka HSPDP, uba dei ruh u myntri ka sorkar jylla u bah Samlin Malngiang.
Haba kren sha ki nongthohkhubor, hadien ba la wai ka jingthep kyrteng ki kyrtong ka HSPDP, ki la pynpaw ba ki ieng skhem ha ka nongrim ban pyntreikam ia ka Inner Line Permit (ILP) hapoh kane ka jylla bad ki la ong ba ha ka mat elekshon jong ka seng HSPDP ruh ka ILP ka dei ka thong kaba hakhmat tam eh.
U bah Samlin Malngiang u la ong ba na ka liang jong u, u la dep ban ia kren hapoh ka sorkar ban dawa ban pyntreikam noh ia ka ILP kumba u paidbah u la kwah, hynrei u la ong ba u Myntri rangbah ka jylla u Conrad K Sangma u la ong ba kane ka dei ka sorkar khleh khaw lang bad ha ka sorkar khleh khaw lang hap ban peit shuwa ia ki mat kiba baroh baroh ki monlang (ki ishu ba long common) ym ia kaba mon tang uwei ne 2 ngut. U la ong ba ka sorkar ka la rai ba lada ka Citizenship Amendment Bill, 2016 kan long aiñ yn wanrah beit ia ka ILP.