U MR u dei ban kham kren eh ban khot noh ka sorkar pdeng:Hamlet

Shillong: U nongialam ka People Democratic Front (PDF) uba dei ruh u myntri sorkar jylla, u bah Hamletson Dohling u la ong ba u myntri rangbah ka jylla u Conrad K Sangma u dei ban kren kaba khem eh ia ka sorkar pdeng, khnang ba kan nym pynslem shuh ban khot iakren ia ka kynhun MDA halor ka Inner Line Permit (ILP) kumba la mynjur da ka ïing dorbar ka jylla ha u bnai Nohprah mynshem snem.

Haba kren sha ki lad pathai khubor mynta ka sngi, u bah Hamletson u la iathuh ba ha kane taiew, ki nongialam ka PDF kynthup ma u, ki kynduh ia u myntri rangbah, ha kaba kila pynpaw ia ka jingsngew khia ia ka jingpynslem ka sorkar pdeng ban khot iakren ia ka kynhun MDA.
“Ma ngi ki nongialam ka PDF ngim ioh thiah ngim ioh dem khlem pat ioh jubab na ka sorkar bad ka jingpynslem ban khot na ka sorkar pdeng halor ka ILP”, la ong u bah Hamletson.
U la bynrap, “Ngi la iakynduh ia u Myntri Rangbah ban pynpaw ia ka jingbym sngew tynnad ia ka jingpynslem ka sorkar India”.
Kham mynshwa, u myntri ka tnad kam pohïing ka ri, u Amit Shah u la ong ia u Conrad ba un sa khot biang ia ka jingiakynduh bad ki nongialam ka sorkar MDA hadien ba la kut ka elekshon MLA ha Delhi, kaba la kut ha kane ka 8 tarik.
Wat la u Conrad u la iakynduh ia u Amit Shah hynrei u shu pyntip ia ki rai ka iing dorbar ban dawa pyntreikam ia ka ILP bad ban pyllait pura ia ka CAA na ka jylla.
U bah Hamletson u la ong ba kila pynsngew ha u myntri rangbah ba lada ka sorkar pdeng kan iai pynslem kan long ka jingbym sngew tynnad.
U la iathuh ba u myntri rangbah u la pyntip ia ki ba u la dep iakynduh bad u Amit Shah u myntri tnad kam pohiing ka ri ha kaba u la kyntu ia u ban khot iakren noh kham kloi.
“Ha ka jingiakynduh, ngi la kyntu ia u myntri rangbah ban shim khia ba ngin leit iakynduh ia ka sorkar pdeng kloi khnang ban iashai halor ka ILP”, u la ong.
U la bynrap, “Ngi kwah ba u Myntri Rangbah un kham pyneh ha kaba iadei bad kane ka kam ban ioh iakynduh noh ia ka sorkar pdeng”.
U la ong ba lada thaw sorkar mano mano ruh, ka jyla ka dei ban ioh beit ia ka ILP namar ba lada pynslem shi pynslem, ka pyni ia ka dak bym sngew tynnad.
Ka ïing dorbar thawain ha ka 19 tarik Nohprah 2019, kala shim ia ka rai ban dawa pyntreikam da ka ILP ha kane ka jylla bad ban pyllait pura ia ka Citizenship Amendment Act 2019 na ka ka jylla.