U Modi, u wad jaka ban leit shongthait ban bam pizza, bam momo, ong U Lalu Yadav

U Lalu Prasad Yadav, President jong ka seng Rashtriya Janata Dal, ula kynthoh hynnin ka sngi, ba U Narendra Modi, myntri rangbahduh, u diaw mynsiem shibun eh, ba un rem elekshon ha u snem ban sa wan bad mynta, u dang wad jaka ban leit sah jah thait noh shabar ri, ynda un rem elekshon.

Ka jingkynthoh jong U Prasad, ka dei hadien, ba ki nongthoh khubor, ki kylli jingkylli, halor ka mad kaba ong “Quit India” kaba U Modi, ula kynnoh pyrshah ia ki liang pyrshah, hadien ba thaw ia ka kynhun INDIA, kaba dei ka kynhun ki riew bamsap, ki nongsynshar thombor bad ka sain pyrthei pynhun jaitbynriew.

Haba jubab U Lalu, u ong “U dei U Modi, uba mut ban phet noh bad ka dei, na kata ka daw, ba u leit shang sha kylleng ki ri, ka pyrthei. U leit peit jaka lypa, namar ba u kwah ban leit shong jahthait ban bam pizza, bam momo bad bam chow”.

Katei ka jingkren U Lalu, ka la pynmih ia ka jing iarkhie pashait kiba bun bad ki nongthoh khubor. U Lalu, u dei uba ju mlien bha, ban kren ki ktien komik bad kiba pynrkhie ia kiba bun. U Lalu, u kren hynnin ka sngi, ha ka jingialang, ba la pynlong da u khun jongu, U Tej Pratap Yadav, myntri ka sorkar Bihar.