“U Mawbriew” ka jaka sah U Syiem Saitsnier, hajan Nohwet

Da U Sketarjunes Khongsar 8974227328
Kum shi bynta ban ia sam, ha kaba pynneh pynsan ia ki dienjat u longshuwa, nga u Nong-shong shnong ka shnong Nohwet Raid Rangnah nga sakhi ia ka jinglong phylla une u Maw ba la jer kyrteng “U MAW-BRIEW” ba la pynlong jaka sah u “Niang Raja” u Syiem synteng ne “U Kyndurraja” ha ka ktien shnong.
Arspah snem tam (200 years ago) mynshu-wa u la wan sah tang shi kilometer shaphang shathie ka shnong Nohwet. Ha u don ki matti jong une u syiem, kiba i shongkun bad i don jingmut shibun ban peit.
Ka trai jong u ka long kum ka iingpaki dulan, kaba don ki almari ban buh tiar buh tar, u Mawpalong ban thiah bad jaka buh tiar rem dor bad ha syngkai jongu, don u panpoh, uba i phylla ban peit.
Ha ka met jong u ki kyndon rynsan ba don jingmut ban batai. Ha khlieh jong u pat don ka jaka shong pyngngad ba lah ban iohi ia ka Bangladesh bad ki lum ki wah kiba khring da ki dur ka mariang ba ithiang ban peit. Ha syndah jongu, don sa uwei pat u maw, uba ki khot u maw “Jok” u long dur thik ia u jok buh um.
U Niang Raja u dei u Syiem synteng ba la wan poi sha kane ka jaka ban buh Matti – Matjat kum ka muhor ban shong sah shongduh ha kane ka jaka. U Babu Alwen Thangkiew na Nongsorphan ba syndah bad ka shnong Nohwet u la rwai myllung ia ki Matti une u Syiem, ha kine ki jaka bad ong ba ka jaka saitsnier jong u ka don ha Wah Lasiang kaba don ha Nongsohphan Raid Lyting.
Da shisha don bun ki jaka ba i phylla ban peit hapoh ka Raid Rangnah bad ha ki sawdong sawkun ka shnong Nohwet ba la buh da u Blei Nongbuh nongthaw ka mariang, khamtam ha kane ka juk tourist mynta.
Hynrei ki jingeh kiba khraw ba kah dum ha ka liang ka surok bad lynti iaid kjat kaba long ki diengpynkiang ia ki tourist ban poi suk ha kine ki jaka.
Da kaba burom nga kyrpad bad khmih lynti ia ka Tourist Department kan phai khmat lem sha kine ki jaka phylla.