New Delhi,
13 Jymmang:
Mynta ka la dei sa ka pali jong ka NCP, ba kan khyrwait ia ia ka seng Congress, kaba dei ruh ka kynhun kaba ia treilang bad ka sorkar UPA ha Delhi, ha kaba ka seng NCP, ka ong, ba ka don kam, ia ka sorkar kaba skhem bad ka ban trei bha, ha kine ki san snem, ki ban wan.
U nongialam ba rangbah jong ka seng NCP, uba dei u myntri jong ka sorkar India, U Praful Patel, u ong ba dei ban ailad ia ka sorkar kaba la mon da u paidbah, ba kan lah ban treikam bha shakhmat.
“Phi khot ia ka, ka jingkhein antad lane ka jingsngew jong uba bun, hynri, ka jingiakren, ha kane ka sien, ka kdew shai, ba ka BJP, kan dei ka seng, kaba bun eh, ki MP ha kane ka sien kaba mynta” ong U Patel, haba iakren, halor ka jinglong jong ka elekshon MP, kaba dang shu dep.
“Lada jia ba ki lah ban ioh shiteng ne tam ia kata bad lane lada jia ba ki donkam paralok ban ia treilang bad kano kano ka seng sain pyrthei, kan sa paw shai, ha ka 16tarik Jymmang. Hynrei, ka donkam ka sorkar kaba skhem bad kaba trei bha, na bynta ka ri” ula ong shuh shuh.
Haba la kylli, la ka NCP, kan kyrshan ne em, ia ka NDA, lada jia ba ka ioh duna briew, na ka 272ngut, U Patel, u ong ba ka NCP, ka dei kaba don ha ka kynhun jong ka UPA bad kumta, katei ka rai, ka dei ban neh bad u paidbah, ula ailad shiphew snem, ban trei, na bynta ka bha ka miat jong u paidbah.
Na ka liang jong U Kamal Nath, uba dei u myntri jong ka sorkar India, ula kren shai mynta ka sngi, ba ka jingkren pyrshah ia ka jinglong nongialam jong U Rahul Gandhi, ka dei ka jingkynnoh kaba bakla, namar ba U Rahul Gandhi, um dei satia, uba la ju don hapoh ka jingtreikam jong ka sorkar UPA.
Ula ong shuh shuh, ba ka sorkar U Manmohan Singh, kam shym la lah satia ban pynsngewthuh paidbah ia ki prokram jongka, kiba ka la trei bha baroh shi katta.
U Kamal Nath,u kyntait ruh halor ka jingai jingkhein jong ki kotkhubor, ia kane ka jingkhein kaba mynta, namar ba u ong ba ha u snem 2004 bad 2009 ruh, ki la bakla, haba ai ia katei ka jingkhein, hynrei, u ong, ba kaba bha, ka long ban ap beit haduh ka 16tarik Jymmang 2014.
Ha kawei pat ka liang, U Arun Jaitley, uba dei u nongialam ba rangbah jong ka seng BJP, ula kren iaroh mynta ka sngi, ia u myntri rangbahduh, Manmohan Singh, ha kaba u ong, ba u long u briew, uba don ka jinglong kaba khraw shibun.
U Jaitley, u ong ba U Manmohan Singh, u dei u briew, uba stad, uba la ju pynkhreh bha, ia ki kam,kiba u trei bad kiba u dei ban iakynduh.
U Singh, u dei u nongialam jong ka iing ha Rajya Sabha, katba U Jaitley,u dei u nongialam liang pyrshah ha katei kajuh ka dorbar bad ha kaba ki la ia don lang, la shiphew snem kynthih kum ki nongialam jong ki arliang mamla bad u myntri rangbahduh, u long uba don burom bad uba don ka kyrdan jongu, ong U Jaitley.
La ong shuh da U Jaitley, ba u myntri rangbahduh, u shim ia katei ka kam, lyngba ka jingbthah jong ka Sonia Gandhi bad kumta, u dei ban treikam ialade, ha kitei ki kyndon.
U Jaitley, u ai jingiaroh ruh ia u myntri rangbah duh, ha ka por, ba u long u myntri ka tnat pla pisa, ha ki snem 1991-96, ha kaba u ong, ba ki dei ki snem, ki ban iai sah kynmaw, ha ka Ri.
Phi don ban ong eiei?