U Ma Vincent, u kren nonsense bad u ak innocent; kynthah tyngeh U ma Rymbui, ia U Ma Pala

Shillong:U bah Lahkmen Rymbui u MLA ka United Democratic party, uba long ruh u Myntri sorkar jylla, u la ther tyngeh ia u President ka Meghalaya Pradesh Congress Committee (MPCC) u bah Vincent H Pala, da kaba ong ba u bah Vincent u kren nonsense bad u ak innocent.

Kane ka jingkynthoh kaba la wan na u bah Rymbui pyrshah ia bah Pala ka long hadien ba na ka liang u bah Pala, u la kynnoh ba ka Party UDP ka dei ka party kaba jur tam ka jingbamsap ban ia ka party NPP, ha baroh ki liang la ka dei ha ka tnad pule ne ka tnad kam pohing.

Haba kren bad ki lad pathai khubor na ka liang u bah Rymbui u la ong “Ha ka jingshisha President ka MPCC u la la dei ban wad ia ka daw, ba balei mar sien wan ma u kum u nongialam baroh ki la ia kiar lut ia ka Congress, hynrei u pynlut ka por pynban ban kdew ia ki wei ki party “.

“Ka party UDP kam dei ka daw ba ka jot ka Congress, hynrei dei hi u bah Pala u ba long ka daw ba la pyntroin ia ka Congress, ha ka jingshisha kum u nongialam uba ki briew ki don ka jingkhmih lynti ba un dei u wei na ki nongialam ki ba don ka jingkyrmen ha ka jaka ban un pynkrheh ia ki mat trei kam na ka bynta ka jylla, lada ki paidbah ki ai lad ban synshar naduh ka snem 2023 haduh 2028, hynrei u pynlut por ialade ban kdewkti ia kiwei bad kane ka long ka bymlah ban pdiang” u la bynrap.

“Na ka liang jong nga, ngan ong shi kyntien ia baroh ki jingkynthoh kiba u bah Pala u la ong pyrshah ia ka party UDP kata ka long ba u bah Vicent u kren nonsense bad u ak pat innocence”.
Haba kylli halor ka jingthmu ka Congress ban charge sheet pyrshah ia ka sorkar MDA u bah Rymbui u la ong “U MPCC president mynta u la kwah ban long kum u nongujor, u nongwadbniah, u nongiasaid bad u nongbishar bad halor kine baroh, ai ki paidbah hi kin bishar ia kata”.