“U Lat un mynjur ia ka Ordinance ki Parliamentary Secretaries”

Shillong, 22 Jylliew:
U Myntri Rang bah ka jylla u Mukul Sangma u la ong ba u Lat ka jylla un sa mynjur beit ia ka Ordinance ba la pas da ka sorkar ia ki Parliamentary Secretaries.
Ha ka jingiakren bad ki nongthoh khubor mynta ka sngi, u Mukul Sangma u la ong ba ka ain mait kyrteng kam nym ktah ei ei ia ki Parliamentary Secretaries namar ha kane ka jylla, kane ka ain ka la don lypa ym ha New Delhi.
“U Lat un sa mynjur beit ia ka Ordinance”, la ong u Dr Mukul haba kylli ba u Lat u la pynslem ban mynjur ia kane ka ain, wat la ka la iaid bun bnai naduh ba ka iing dorbar thawain ka la pdiang ia kane ka Ordinance ha une u snem.
Hynrei ha kawei ka khubor la iathuh ba u Lat ka jylla u lah ban nym pdiang ia ka Ordinance hadien ba u President ka ri u la kyntait ban soi ia ka Bill ban ailad ia ki parliamentary secretaries ka sorkar AAP ha Delhi.
Dang shen, u Parliamentary secretary ba peit ia ka Tourism u Bah Kennedy C Khyriem u la ong ba ka ain Delhi ka iapher bad ka jylla Meghalaya namar ba ka Delhi kam dei ka jylla ka dei tang ka Union Territory katba ka Meghalaya ka dei ka jylla ba pura.
“Ka Delhi kam dei ka jylla ba pura, ym kiwei ki jylla. Ki parliamentary secretary ki don ha man ki jylla kum ha Assam bad ha kiwei ki jylla”, la ong u MLA ka Mawphlang haba iakren bad u Nongthoh khubor.