B.M.Lanong
Haba u Lat Tathagata Roy ka Meghalaya uba thung ka Sorkar MDA u Prime Minister Modi, um sngap shuh ia ka jingbthah ka Sorkar Meghalaya kaba sngewthuh jingmut lang bad ka Sorkar Pdeng, ka la wan shimti kein ka kynhun ba don bun ki MDC Congress ha KHADC, hynrei baroh lang, ka kynhun ka don 14 ngut, kumba don ka kynhun United Democratic Alliance (UDA) 14 ngut.
Kane ka jingdon 14-14 ngut ka la pawshai ha ka 20.11.19 haba la iatynjuh bor ia ka mat weng sorkar (No Confidence Motion) bad ha ka 22.11.19, haba la jied ki 14 ngut hi ia u CEM thymmai, Bah Latiplang Kharkongor. Ka kynhun UDA kaba don 14 ngut kan shym shim bynta.
Ym sngewthuh shuh, kumno u Chairman Bah P.N.Syiem u thep vote lang ha ka 22.11.19, haba ka kynhun UDA kam shym leit shim bynta. La don tang kawei ka kynhun kaba la ioh pura 14 ngut. Tip ha kano ka kyndon jong ka ain, u Chairman ruh u thep lang shi vote, haba ki riti pyniaid dorbar ba la kdew ka Article 100 jong ka Constitution of India, ka kren shai, ba u nongpyniaid dorbar u lah ban thep vote tang haba don ka jingryngkat bor.
Namar arsien ka jingialeh ha KHADC kumba la kdew haneng, ka la paw 14-14. Na kata ka daw ka Sorkar ka la ai jingmut ia u Lat ba un wanrah noh da u nongpeit shipor, u Administrator kumba ju leh hapoh ki kyndon trei kam, namar lymda don jingkylla da kumwei, kan eh ia kano-kano ka kynhun kaba don 14 ngut, ha ka ing dorbar kaba 29 ngut (uwei ula khlad) ba kan trei kam.
U Lat uba la shah ban jur ha ka Seng Congress bad ki nongkyrshan ka Seng Congress, ula buh jingeh mynta ialade, namar haba ula tip ia katei ka jingiatan ryngkat bor, ula kyntait ia ka jingai jingmut ka Sorkar bad u la ailad ia ka kynhun ba don bun ka Congress ban shimti. Tip un leh kumno, lada iatan tyllai sah kumne.
To tip ba kiba kynran dien kila rem lypa wat lada u chairman um thep ka vote ruh, kila rem lypa namar ki khlem wan shim bynta, ki la ai walk over ha kiwei….
Ka jingtreikam jongka EC hapoh ka jingialam jong u Bah Teinwell Dkhar dang tang 8 bnai kala pynwit bha khamtam iaki barjylla ba leh benami, kane ka lah ban don khubor eiei haka jingpdiang kyrkieh u Lat ka jylla ban ithuh noh iaka EC kaba thymmai, ngi tip bha ba u Lat ka jylla Meghalaya um don iaka discretionary power kumno u iaid lait iaka sorkar jylla.