U Lambha Nongrum, uba duna bor pyrkhat, ong ka kaiphod Hap jubab ka Dorbar Smit ba shim ki paidbhur ia ka ain

Shillong,24 Risaw:
“Ka Dorbar shnong Smit ka hap ban ai jubab balei ka la shah ia u paid bhur ban shim ia ka ain ha kti lajong’ ong ka kaiphod kaba dang iaid shakhmat halor ka jingjia shah pyniap ha Smit na ka daw ka jingiakynnoh Men-shoh-noh. Katei ka kaiphod u Addl. Magistrate Bah Donny Wahlang kam pat shym la poi sha kaba kut, hynrei ka dang iaid shakhmat. Ka kaiphod ka kdew ba ka jingshim jong ki paidbhur ia ka ain ha la kti ka dei halor ka jingshah pyniap jong lai ngut ki briew kiba la shah kynnoh men-shoh-noh bad katei ka jingjia ka la jia ha ka 16 tarik u Nailar 2013.
Lah ban kdew ba shi sngi hadien ba ka la mih ka jingiap briew ha Smit, ka shnong Smit ka la lum ia ka dorbar pyllun hakaba la wan ban shim bynta shynrang bad kynthei bad ha katei ka Dorbar la mih ki jingong ba ka jingpyniap ia ki lai ngut kiba la shah kynnoh men-shoh-noh ka dei halor ka jingphla jong u samla Lambha Nongrum uba la khot ‘Pasan-Pasan’ haba la kylli ia ka daw ka jingshah bret lyngkhuit jong u sha um, bad tang hadien khyndiat por u paidbhur u la tur sha ka ing ba don kita ki pasan bad ki la shim shi syndon ia ka jingim jong ki ( na kiba iap ki don ar ngut ki pasan). Ki la mih bun ki jingiakren hadien katei ka jingjia ba sngew shyrkhei ha Smit ha kaba don kiba ong ba ka dei ka jingngeit biej bad don pat kiba ngeit ba don ki men-shoh-noh, la mih ruh ki jingong ba ki jingshisha baroh kin paw hadien ba u samla Lambha Nongrum u la ioh ia ka met kaba koit ba khiah bad hadien ba u la mih na hospital ( namar ha kato ka por u dang shah sumar ha Nazareth Hospital).
U Lambha u la mih na hospital, ‘ U dei uba don ka jingpang duna bor pyrkhat, bad u dei ruh uba la sahteng ha ki jaka sah ( Hospital) ki briew kiba don jingduna bor pyrkhat ’ iathuh ka kaiphod kaba peit bniah halor ka jingjia ha Smit. Katei ka kaiphod ka la ong ruh ba ka long kaba eh ban pynshisha ia kata ka jingngeit men-shoh-noh bad men-ai-ksuid , ‘ym lah ban pynshisha ia kata( menshohnoh)’, ong biang ka kaiphod kaba haduh mynta ym pat dei kaba khadduh hynrei ka dei tang kaba dang iaid shakhmat.
Lah ban pynkynmaw ba 12 ngut kynthup shynrang bad kynthei , ki la shah kem ha ki pulit halor katei ka jingjia ha Smit bad napdeng kitei ki 12 ngut ki don ruh kiba la ioh jamin bad don ruh kiba dang don ha kti ki pulit.