U labuh ma U ia ka Jingsynshar

AIS SUJA

U Blei, u labuh ma U ia ka jingsynshar, kata hadien ba u la lah thaw ia ka bneng bad ka kyndew. Genesis 1:1. U ong- Nga la pyllong ia ka khyndew nga la thaw ruh ia U Briew halor jongka. Isaiah 45:12. U la thaw ia ka ban shong Briew. Isaiah 45:18. U David U ong- Naduh mynhyndai me la seng ia ki nongrim jong ka khyndew. Salm 102:25.

Hadien ba U Blei u la lah thaw ia ka bneng bad ia ka khyndew (Earth) u la buh ruh ia u briew ban synshar halor jongka. Genesis 1:26-27. U Blei u la kyrkhu ia u Briew bad ka Briew. U ong- To da nangkha bad nangroi to pyndap ia ka khyndew bad to Synshar…. Genesis 1:28.

Ngi iohi hangne ba U Blei u la ai ia ka jing synshar ha ka kti U Briew halor kiei kiei baroh, bad u Briew u long u kynrad halor kiei kiei baroh bad halor u para briew hi kumjuh U Blei u la ai ban synshar ban peit ban khmih ban pyniaid ia kiei kiei kaba bha tam. Kumta U Briew u dei u kynrad halor ka khyndew baroh.

Haba ong ka Jingsynshar ne Govern ka thew ia ka Sorkar Government. Kaba mut, ba u Briew u dei ban sngewthuh ba U Blei u la ai ha U Briew ban peit ia ka bha ka miat haka imlang sahlang haka long Briew manbriew. Kam mut pat ba U Blei u ai ha U Briew ban Synshar donbor ne Ban pynjot ia ka Pyrthei namar tang ha ka Kti ki biej la pynjot ia ka pyrthei.
Dei nakata kadaw, haba U Blei u la buh ka jingsynshar (Government) u la ong ba U Briew u dei ban Burom ia kata ka jingsynshar, namar kine baroh ki long na U da U bad sha U. NongRom 11:36. Dei nakata kadaw U Blei U kyntu ia ki Briew baroh – ban pyllong ki jingkyrpad, ki jingduwai, ki jingiasaid, naka bynta ki Briew baroh, nakabynta ki Syiem ki ba Khraw Batri khnang ban ngin ioh ka jingim kaba Suk kaba jar jar ha ka jingriewblei bad jingshida baroh. (Pray much for others. Plead for Gods Mercy. Pray for kings and all who are in Authority Over us or in places of high Responsibility). 1 Tim 2:1-2.

U Blei u kyntu ba ki briew baroh kin buh ki jingduwai jingkyrpad jingiasaid naka bynta ki Syiem ki Nongsynshar kiba don ha ka sorkar namar la sngewthuh ba ka jingsynshar ka long kaba na U Blei.
To ngin ia peit aiu lajia ha Israel hyndai hakata ka jingsynshar Government jong ki aiu ki leh? Ki nongsynshar ka Ing Israel, ki shun ia kaba bha, ki Ieit ia kaba sniew: ki khoh ia ka snep jongki na ki bad ia ka doh jong ki naki shyieng jong ki…. ki tei ia ka Seion da ka snam, ia ka Jerusalem daka Pop. Mikah 3:1-10. Ki khwan ia ka lyngkha ki briew ki knieh iaki. Ki leh jubor ia u parabriew. La pynjot noh khoit ia ngi ong ki paid Israel Mikah 2:1-4. U Blei u bitar halor ki nongsynshar ki Israel. U la buh rieh ia ki khmat na ki kat kumba ki la leh sniew haki jingleh jongki. Mikah 3:4.

U Blei u Maham ia ki nongsynshar ki Israel namar ki long kiba sarong. U ong- wat ai ba u Riewstad un sarong hala ka jingstad lymne uba khraw bor un ym sarong hala ka bor. U Riewspah to un ym sarong ha ki spah jong u. Jeremaiah 9:23.
To ngin kynmaw ba dei U Blei uba labuh iaka aiu ka Jingsynshar ne Government, naduh ba u la sdang ban buh ia u briew hakane ka khyndew (earth).

Ka Ri jong ngi kadon hapdeng bun ki jingeh. To ngin pyllong ki jingduwai jingiasaid naka bynta ki nongsynshar kiba don ha ka jingsynshar (Government) na ba kin sngewthuh ba ki dei tang ki shakri ym ki kynrad ba kin pynrit ym ban pynkhraw ialade namar ka ktien U Blei ka ong – To duwai naka bynta jong ki. 1 Timothy 2: 1-2. Ai ba ka ei kaba ki lasmai ha khmat U Blei kin leh ia kata namar kim lah ban smai lamler. To iaduwai naka bynta ka Ri bad ia ki nongsynshar jongka ba kin lah ban synshar ha ka lynti kaba Hok bad kaba Beit. Amen.