U la long u director ka sports, nga ruh nga dei u nongialehkai, ong U Bah Banteidor ia U bah Shangpliang

Shillong: Ha ka jing ia tai ha iing dorbar Jylla mynta ka sngi, U Bah Banteidor Lyngdoh, myntri ka tnat ialehkai, ula jubab ia U bah HM Shangpliang Congress – I, halor shibun ki jing kylli jong utei U MLA, da kaba ong “Nga sngewnguh shibun eh ia U MLA ka Mawsynram, namar ba u sngewkhia shibun ia ki nongialehkai, namar ba ha kawei ka sien ba ladep, U (Bah Shangpliang), ula long u director ka tnat ialehkai. Hynrei nga kwah ruh ban iathuh ha iing, ba nga ruh nga dei u riew ialehkai. Nga ieid palat ia ka sport, naduh tynrai ka dohnud jongnga bad ngan pynbeit bha ia ka tnat hi baroh kawei” ong U bah Banteidor.

Nangta, ula bteng ia ka jubab jongu, ba un thaw lad ba ki nongialehkai kin ioh ban leit sha Ranchi bad mar kumta hi U bah Shangpliang, u ong shuh shuh “Ka jingialehkai ha Ranchi ka la kut”. Mar kumta u myntri, ula jubab pynstet, da kaba ong “Sha Bengaluru ne sha kiwei ki jingialehkai ka Jylla, kan leit ban ia shim bynta beit”.