Shillong: U nongialam ka BJP uba long ruh u myntri ha kane ka sorkar jylla u Bah AL Hek bad kumjuh u MLA shimet uba don lang ha kane ka sorkar, u Bah Lambor Malngiang, ki la pynpaw ba u kyrtong monlang ka sorkar Meghalaya Democratic Alliance (MDA) u dei ban iakhun na ka shap laitluid (free symbol) ym na kano kano ka party.
Haba kren mynta ka sngi, u Bah Hek u la ong “Nga kyrshan ban iakhun da u kyrtong monlang hynrei ym na kano kano ka party”, la ong u Bah Hek.
Ki nongialam seng trai ba kynthup ia U Bah Donkupar Roy, Bah HS Lyngdoh, Bah SL Marbaniang, Bah MN Mukhim bad U bah Paul Lyngdoh:File
“Kumba ialeh u Bah SL Marbaniang ha u snem 2004, na ka Regional Parties Alliance (RPA), dei ban leh kumjuh ha kane ka kynti da ka MDA”, la ong u Bah Lambor.
U Bah Lambor u la ong ba ha utei u snem, u Bah SL Marbaniang u la iakhun na ka shap laitluid khlem dei na kano kano ka party ruh watla ki iakyrshan lang baroh ki party riewlum ha katei ka por.
“Ka coordination Committee ka MDA, kan shim ia ka rai kaba kut halor kane”, bynrap u Bah Lambor uba long u chairman ka Meghalaya State Planning Board (MSPB).
Watla kim pyrshah ia ka kyrteng jong u Dr Jemino Mawthoh kaba la dep tyrwa da ka UDP ban iakhun ia ka MP elekshon hynrei kim sngew iahap ba un iakhun da ka shap ka UDP ha ka kyrteng ka MDA.
Kumjuh u Bah Hek u la ong, “U briew ba jied da ka MDA u dei ban iakhun kum u kyrtong ka MDA lane ka NDA khlem dei na kano kano ka party”, la ong u Bah Hek.
U la ong ba lada kane ka jingmut kam poi sha ka thong, kan long kaba eh ban pdiang ban kyrshan ia u kyrtong uba dei na ka party.
“Nga kwah u kyrtong monlang lada un iakhun khlem ka party, dei ban iakhun kum u kyrtong shimet kum u kyrtong ka NDA lane MDA”, u la ong.
U la ong biang, “Ha Ranikor ruh, kam don u kyrtong monlang hynrei ka sorkar MDA kam don kano kano ka huri hura, baroh ki ialeh la kajong lajong bad kumjuh ha ka MP ruh kan nym don jingpher ia ka sorkar”.
Ka UDP ka la dep rai ban tyrwa ia ka kyrteng jong u Dr Jemino ban long kum u kyrtong ka MDA ha kane ka elekshon MP kaban wan na Shillong parliamentary constituency.
Ha kawei ka liang, u Bah Hek u la ong ba kum u nongialam ka BJP, u kwah ban iakhun beit ia ka MP na Shillong bad na Tura hynrei kan shong ha ka seng kmie ban ai ia ka rai kaba kut.
“Ha ka MP bad ka MLA elekshon ka iapher, ha ka MLA kumba 80 percent ki jied ia u briew bad ha MP ki jied ia ka party”, la ong u Bah Hek bad bynrap, ‘ka BJP ka don ka lad ban jop namar ba ka don ki tnad ha baroh ki shnong”.