U kyrtong ka HSPDP na Mairang

Nongstoin, 25 Nailur:
Wat hadien ka jingphet noh jong ki saw hajar ngut ki nongkyrshan ba shit rhem kynthup ruh ia ki nongïalam ba hakhmat jong ka party Hill State Democratic Party (HSPDP) Mairang Constituency, ha kine ki bnai ba la dep ia kaba la mih ka jingkynnoh ba ka dei ka jinglehdon bor jong u president rangbah jong ka party u bah Aredent Miller Basaiawmoit, hynrei kumba ka long mynta katei ka seng, ka la sdang ban wan dur biang wat ban kyrmen ban ioh ia ka jingjop ha ka election shiteng samoi sha ka KHADC.
Katei ka paw shai ruh ha ka sngi saitjain jong ka taiew ba la lah ha kaba ka HSPDP, Mairang Area Unit, ka la pynlong ia ka jingialang na ka bynta ban rai bad bynbna ia u kyrtong u ban iakhun na ka Mairang Constituency ha ka election shiteng samoi sha ka KHADC ka ban sa long ha ka 13 tarik u Nohprah.
Ha katei ka jingialang kaba la long ha Pyndengumiong, ka HSPDP Mairang Area Unit ha ryngkat ka jingiadonlang jong ka HSPDP Central Body ka la pynbna ia ka kyrteng jong u bah Alex Kharayntiew kum u kyrtong jong ka seng, u ban iakhun na Mairang Constituency ha katei ka election shiteng samoi.
U bah Alex kyrtong ka HSPDP na Mairang bad u ba dei ruh ha kajuh ka por kum u President jong ka party na katei ka thain haba ai jingkren ha katei ka jingialang u la ong ba ka seng HSPDP kadei ka seng, kaba ju ioh ia ka jingjop napoh Mairang Constituency ha kipor kiba mynshwa bad ka jingjop kaba khatduh jong ka seng, na katei ka thain ka dei ha u snem 1987.
“Naduh kitei ki snem haduh mynta bala iaid haduh kumba 23 tylli ki snem ka party ha kane ka thain kala shu shah inoh shrah, bad lyngba kane ka election kaba mynta nga don ia ka thong ban pynkhie im biang ia ka party HSPDP hapoh Mairang, bad nga khmih lynti ruh ba kane ka party ha u 2018 kan sa kiew kham sha jrong” ong u bah Alex.
Katba na ka liang jong u president ba rangbah duh jong ka party HSPDP bah Ardent Miller Basaiawmoit, haba ai jingkren ha katei ka jingialang u la ong ba kum ki nongialam jong ka partu HSPDP ki don ia ka jingpyrkhat ban ioh noh ban knieh ia ka bor synshar jong ka Congress ha u 2018, bad u la ong ruh ba katei ka sorkar Congress kala ialam bakla ia ka jaitbynriew lakumba 45 tylli ki snem.
“Ngim don ia ka sorkar kaba iohi jngai, kaba don ia ka polisi kaba biang, hynrei ngi don ia ka sorkar kaba pynbiang ia ngi tang ha ki por election, lada ngim don ia ka sorkar kaba lah baniohi jngai bad aaba don ia ka polisi kaba biang baroh ki jingeh kiba don ha sor Shillong kin sa sdang ruh ban pur suki suki sha sha ki nongkyndong, kumta ka HSPDP kan sei ia ki nongialam ki ban pynbeit ia ka jingmut jingpyrkhat jong u paidbah ym ban pynbiej ia u paidbah” ong u bah Ardent.
Shuh shuh u la ong ruh ba ka party HSPDP kam ju iapein klumar bad ka jaitbynriew bad u la ong ruh ba kane ka election shiteng samoi kaba mynta kan long ruh kum ka semi final na ka bynta ka general election jong u 2018, bad lada ki paidbah ki i bit bad ai ia ka lad ia ka HSPDP ban wan ha ka bor, ka party kan ai ka jingshakri kaba pakka tam ia u paidbah.
Kiwei kiwei ki nongkren ha katei ka sngi ki kynthup ia u Vice Peesident jong ka Party u ba dei ruh u MLA ka Rambrai bah K.P. Pangniang, u MLA ka Nongstoin bah D. Jyndiang, u bah W. Mawsor MLA ka Mawshynrut u ba dei ruh u Genl Secretary ka HSPDP, ka kong Teilinia Thangkhiew MDC ka Mylliem bad kiwei kiwei.