U kyrtong ka Congress dei uba la duh jingshaniah ha ka UPA Kam u bah Paul ba ka Congress ka la hiar sted

Shillong,18 Lber:
U bah Paul Lyngdoh , u kyrtong ka UDP mynta ka sngi u la wan thep kyrteng ialade ha u Deputy Commissioner ka East Khasi Hills u Sanjay Goyal na ka bynta ban ia khun ha kane ka elekshon MP Lok Sabha 2014. La wan synran ia u bah Paul da u Dr.Donkupar Roy President Rangbah ka UDP uba long ruh u nongialam ka liang pyrshah, u bah Titos Chyne MLA ka Sohra, working President ka UDP, bah Metbah Lyngdoh, bah Allan F Dkhar General Secretary bad kiwei pat ki heh UDP, nalor ka UDP la wan ssynranlang ruh da u James Sangma ka NPP, la wan synran lang ruh da ka lok jong u ka kong Sweety Pala ryngkat bad i khun jong u.
Haba kren sha ki nongthohkhubor ha phyllaw ka DC ophis hadien ba u la dep thep kyrteng u bah Lyngdoh, u la ong ba u kyrtong ka seng Congress uban ia aireng pyrshah ha kane ka elekshon u dei ruh u briew uba wat ka sorkar UPA ruh kam shaniah shuh, namar ba la pynhap kyrdan noh ia u na ka thup ki Myntri sorkar, bad ka jingshah pynhap kyrdan jong u ka pyni ba ka UPA kam shaniah ia u.
Shuh shuh u bah Lyngdoh u la kam ba ka Congress ka la hiar sted , bad u la kyrmen ruh ba mynta ka kynti ki paidbah kin ym bud shuh ia katei ka seng, hynrei kin ai ka jingkyrshan ba radbah ia ka UDP, kaba long tang marwei ka seng riewlum kaba heh bad kaba la ithuh da ka Election Commission of India, bad ka dei ruh tang ma ka kaba la mih ban ia khun ha kane elekshon na baroh ki seng riewlum. U bah Paul Lyngdoh u la ong ruh ba ka UDP ka dei ka seng kaba lah ban ia khun pyrshah ia ka Congress bad ia kane u la ong ba la iohi ha ka elekshon MP 2009, namar ba ka wan ha ka kyrdan kaba –ar bad ka Congress ka tam tang khyndiat. U la kam ruh ba ki paidbah ki la sngew ngiah ia ka jingsynshar ka Congress “ka lynti ban bujli ia ka seng Congress dei tang ka seng UDP” ong u bah Paul.
Haba la kylli na u bah Paul halor ka jingkam jong u ba ka dei tang ka UDP ka seng riewlum ka ban ia khun ha kane ka elekshon katba na ka liang ka KHNAM bad ka HSPDP pat ki la pynpaw ban kyrshan ia u Pastor Basaiawmoit , u bah Paul u la ong ba ka HSPDP bad ka KHNAM ka kyrshan ia u Pastor PBM uba long u kyrtong shimet.
Haba la kylli shuh shuh na u bah Paul hato lada u jop ka UDP kan pyniasoh bad kano ka party ban ia thaw sorkar, u bah Paul u la ong ba ka UDP ka don ar tylli ki lynti ban jied hynrei kumba long mynta ka jingiakren bad ka NDA ka dang iaid shakhmat.