U KSEW: Ki jingai jingmyntoi jong u Ksew ha ka jingim

Kong L Kongwang

Baroh ki mrad ba ri ha iing kidon la kajong kajong ka bynta haka jingim jong u briew. Hynrei ka jingri bad sumar bha ia u Ksew hala iing ka ai jingmyntoi shikatdei iangi bad haka jingwadbniah ba dangshen lashem bun ki briew ki ba ri bad sumar iaki Ksew hala iing ki kham lait naka jingbanbor jongka jingmut jingpyrkhat da kaba pyllut por bad ki.

Ia u Ksew latip ruh kum “U paralok bajan tam eh jong u briew” (‘Man’s best friend’). Watla ka jingpyndonkam iaki Ksew ha kino kino ki kam kala nangduna ha kine ki sngi, hynrei ka jingdonkam bad ka jingkongsan ha iing ka nangkiew. Naduh kaba ri ne sumar ha iing haduh ka jingpyndonkam haki jingialehkai, ka jingai jingshakri, u shim iaka bynta ba kongsan haka jingim jong u briew uba ki iashong iasah lang ryngkat.

Hato aiu ki mrad kilah ban leh naka bynta u briew?Hangne ka jingthoh ka thmu ban pyni iaki jingkongsan bad ki jingmyntoi kiba u Ksew u leh na ka bynta u kynrad haka jingim ba man ka sngi jongu.

1. U PARALOK BA JAN TAM: U Ksew u lah ban long u lok ne u paralok bajan tam eh jongu briew tang lada phi nang ban ieid bad ri ne sumar bha ia u. Baroh ki Ksew ki kham sngewjan ban shakri ia kito ki kynrad kiba iarap bad iajan bad kiwei kiwei ki jingthaw ba im. Kat kum ka jingwadbniah daka Vanderbilt University, u Ksew u lah ban pynduna iaka jingsngew marwei haka jingim bad ulah ruh ban ai kata ka jingsngewieid ha u briew ban sumar naka bynta jongu kum u paralok. Kane kalah ban ai jingmyntoi shikatdei khamtam ia kito ki ba ju mlien ban im bad sah marwei.
2. U LAH BAN PYNDUNA IAKA JINGKHUSLAI JINGMUT:— U Ksew u dei shisha uta u paralok uba lah ban iarap pyllait ia la u kynrad naki jingbanbor jongka jingmut jingpyrkhat bad pyllait na shibun ki jingkhuslai haka jingim da kaba ialehkai ne pyllut por bad u. U lah ban iarap ha kata ka rukom ba teng teng la ju pyndonkam ia u na ka bynta ka sumar therapy haki hospital, ki nursing home ne wat haki jaka shongthait jongki nongleit jingleit. Ban ialehkai, ban kilan met ne ban iaidkai bad mareh lang bad u, ka iarap shisha ban pyllait ia u briew na ki jingkhuslai jong ka jingmut jingpyrkhat bad kine ki kyntiew iaka jingkoit jingkhiah jongka met bad pynduh iaka jing sngew marwei haka jingim. Kat kum ka jingpule ba la wadbniah daka Harvard University bad ka Kansas State ki ong ba ka jingiadei bad ka jingiajan jong u Ksew bad u briew ki iarap ban ialeh pyrshah ha kaba iadei bad ki katto katne ki jingpang klongsnam bad ka autism.
3. U MRAD BA AI JINGSHAKRI:— Ia u Ksew la ju pynheh pynsan ban ai jingshakri, ban iada iangi naki nongshun ne naki riewsniew lane uba lah ban iarap plielad naka bynta kito kiba don jingduna haka dkhotmet jongki da kaba btin lynti iaki. Katkum ka Animal Welfare Information Center jongka USDA, u Ksew uba shah hikai bha ban iada bad ban long u lok bajan tam badki briew u iarap bha haka jingim ba man ka sngi jongngi bad u iarap ruh ban prat lynti ba ngin nang ban im dalade ha pyrthei. Ki mrad kiba ai jingshakri ia la u kynrad kidei kita kiba ioh jingieid ruh na la ki kynrad bad kilah ruh ban shakri khambha ban ia ka jingshakri jongki kynrad iaki. Dei namarkata ngi dei ban ieid bad sumar hok iaki kum uwei u bynta jongka iing ka sem uba lah ban shakri miet la bad sngi lada u ioh jingieid na la u trai. Kidei ruh kiba lah ban shakri khamtam iakito kiba don jingduna haka dkhotmet ban btin lynti ban leit jingleit, ban leit trei bad ban im laitluit. U ksew da ka jinghikai ban shakri u lah ban sngewthuh iaka jingsma jong u briew haba donkam ban wad iakiba jah ne kiba rieh ne ban pyllait im ia kino kino kiba donkam jingiarap.
4. KA JINGAI JINGIADA:— U Ksew ulah ban ai jingiada kaba pura naka bynta u briew uba jan eh bad u. U Ksew uba shah hikai u lah ban ai jingiada kaba kham heh hynrei wat u Ksew ba ri ha iing ruh ulah ban ai ka jingiada da kaba phikir ne wiar tyngeh haba don ki riewsniew kiba iaid tawiar iaki iing ki sem ne kiba iaid tawiar ha shnong ha thaw bad kilah ruh ban sngewthuh lypa ia kiei kiei ki jingjia ki bymju kham jia kiba pynshongsyier iaphi. Da ka jingiaroh jongu Ksew phi lah ban sngewthuh kumno ban phikir ialade bad iaka iing ka sem baroh kawei.
5. LA JINGKITKHLIEH NA KA BYNTA BAN AI JINGHIKAI:–– Bun ki longiing ki pyndonkam ia u Ksew ba ri ha iing ban iarap ai jinghikai iaki khun ki kti jongki ban don ka jingkitkhlieh ialade. Katkum ka jingwadbniah jongka Karen Stephens of Eastern Florida University Parenting Exchange, iaki khynnah lah ban hikai iaka jingkordor ka por,ki dak ki shin bad ki sap ki phong lyngba ka jingiadei kaba bha bad ki mrad ba ri bad sumar hi ha iing khamtam bad ki Ksew da kaba shim iaka jingkitkhlieh naka bynta ban aibam, ialam kai pyngngad, ban hikai ban leit jingleit. Lyngba ka jingiajan ki khynnah bad ki Ksew, kilah ban sngewthuh iaka jingdonkam ban ri bad sumar ia baroh ki jingthaw ba im da kaba burom bad pyni iaka jinglong babha mar kylliang.
   Haba u Ksew ulah ban leh bun kiei kiei naka bynta jongphi khamtam ban ai jingshakri, ban iada bad ban pyllait na shibun ki jingpang jingshitom, namarkata nangne shakhmat to ngin nang ban ri bad sumar bha iaki haba ki don ha syndah jongngi.