U KPA:Kumno ban long u kpa uba don ka jingkitkhlieh naka bynta ki khun?

Kong Linda Kongwang

Ha ka juk bunkam mynta ki por bun ki longkpa kim ju ioh ban pyllait por naka bynta ki khun bad kane ka wanrah iaka jingpra ka iing ka sem bad ka jing iajngai shikpa shikhun.Kum u kpa uba dei u khliehduh jong ka iing, uba peit iaka khia ka shon ha iing bad u ba lah ban kit ia u lumbah ha tyrpeng naka bynta ki khun, phi dei namar kata ban sumar bha iaki bad pyllait kham bun ka por ban ieid bad sngewthuh iaki jingmut jong ki ban lait naki jingkhuslai bad banbor haki jingmut jingpyrkhat jongki khun.

Ka jingiadei shikpa shikhun ka iapher bha bak lybak nakiwei pat ki jingiadei ha iing ha sem, ka iapher bha wat bad ka jingiadei bad la u jong u kpa ruh. Ka jinglong kpa ka kham jur ban don ka jingkitkhlieh haba ia nujor bad kiwei pat ki jingkitkhlieh ha ka jingim jongu. U lah ban hikai iaki khun ban long shlur bad burom ialade, u ri bad sumar bha iaki ha kata ka rukom kaba ymlah batai da ki ktien. Hynrei naka jingbunkam palat khamtam ha kane ka juk mynta, teng teng u duh noh iakane ka lad ban sumar bad pyllut por bad ki. Hynrei na ka bynta ka jingbha ka lawei jongki khun phi donkam ban pyrshang da kine ki jing ai jingmut kiba lah ban iarap iaphi ban ioh pyllut por bad ki khun bad ban don ka jingkitkhlieh na ka bynta jongki.

1. KA JINGPYLLUT POR BAD KI KHUN:— Ha kane ka juk bunkam mynta, u kpa um ju kham iohpor na ka bynta ki khun bad kane ka ktah shibun iaki khun hadien habud. Pyrshang ban pyllut por bad ki da kaba shongkai, ialehkai ne ialam kai iaki shabar sha kiwei pat ki jaka kiba itynnad. Da kaba leh kumne kan ai mynsiem iaki khun ban lait na ki jingkhuslai jingmut jingpyrkhat bad kane ka ialam shaka jingshlur bad ka jingshemphang jongki khun ha ki liang baroh.
2. SNENG DA KA JINGIEID BAD KI JINGHIKAI BABHA:— Baroh ki khynnah ki donkam iaki jingsneng jingkraw bad ki jinghikai babha ym da kaba pynshitom ne sympat iaki hynrei da ka jingieid bad dakaba pynshongnia iaki ktien kiba phi kren haki. Kum u kpa phi dei ban pynkynmaw iaki khun ban leh kino kino ki kam daka jinglong bad da ka jingmut babha khnang ba ki khun kin ym leh bakla.Iai kren bad pyni iaki jingbha bad jingsniew kiba ki iohi. U kpa uba sneng bad hikai iaki khun ha kata ka rukom kaba jai jai,u pyni haka jingshisha iaka jingieid haka bynta jongki.
3. SNGAP IAKI JINGKREN JONGKI:— Man ka sngi ki khynnah ki donkam iano re iano ban sngap bad sngewthuh iaki jingkren jongki namar lada ymdon ba sngap kin diaw bad sngewsih kaba ialam sha ka jingkhuslai haki jingmut jingpyrkhat jongki. Hangne u kpa u lah ban shim iaka bynta ba kongsan ha kane ka por namar ki khun ki kham tieng burom bad ieid ia u kpa ban iaka kmie bad ha kajuh ka por uba lah ruh ban ai jingmut kham bha haba ki kren ne kwah tip is kiei kiei sawdong jongki. Pyllait por khnang ban sngap iaki jingkren jongki bad ki jingeh kiba ki iakynduh, khnang ba kin lait na ka jingsngew marwei bad ka jingsngap jongphi kan nang ai mynsiem iaki khun ban ym buhrieh ia kiei kiei kiba ki tip ne iohi.
4. LONG KI NONGHIKAI BASTAD:— U kpa u ba don ka jingkitkhlieh u hikai iaki khun ban sngewthuh shaphang ka jingbha bad jingsniew jong ki sawdong sawkun bad u ai mynsiem ruh ban leh iakaba bha tam haka jingim. Khmih bniah ba ki khun kin leh kiei kiei kiba bha bad ka jingdon bynta u kpa haka jingim ba man ka sngi jongki khun kan iarap iaki ban sngewthuh kaei ba kidei ban jied naka bynta kaba bha bad kumno ban im ka jingim kaba donburom bad donakor. Haba ki kmie ki kpa ki long ki nonghikai bastad, khlem pep kin ioh iaki khun kiba stad bad shemphang haka jingim.
5. BAMLANG HA KAJUH KA POR:— Ban ia bam iadihlang ha kajuh ka por kadei ka bynta kaba kongsan tam ban ioh iaka longiing kaba suk bad kmen. Hakane ka por ki khun kin iohlad ban kren shaphang kaei ba ki thmu bad kwah ban leh haka jingim. Kan dei ruh ka por kaba biang tam naka bynta u kpa ban sngap bad sngewthuh shuh shuh kaei ba ki khun ki donkam. Lada u kpa un pyllait por khnang ba ka bynta jongki ha kum kane ka por, ki khun ruh kin sngewshngain bad kmen baroh shirta.
6. HIKAI KUMNO BAN PYLLUT IAKA POR:— Ha kane ka juk mynta bun ki khynnah ki pyllut por tang haki mobile phone ne ha ki television, kane kajia namar ki kmie ki kpa kim pyllut por bad la kijong ki khun namar ki jingbunkam ba man ka sngi. Namar kata u kpa donkam ban pyllait por khnang ba ka bynta jongki bad u lah ban shim iaka bynta kaba hakhmat ban hikai iaki khun kumno ban pyllut iaka por. Hikai iaki ban pule iaki kot, ki kot Khubor ne ki kot khana biria, namar lada ki sdang ban pule naduh dang khynnah kan ai jingmyntoi shibun iaki ban long ki jingpule bad ki nongthoh kiba tbit hadien habud.
7. HIKAI BAN BUROM IA KIWEI:— Ka jingia burom kylliang iwei ia iwei ka wanrah iaka imlang sahlang kaba suk bad kmen bad lada ki kmie ki kpa ki burom iakiwei pat ki longkmie longkpa, ki khun ruh kin bud nuksa ban leh iakaba bha tam. Borabor ki khun ki kham teng burom ia la u kpa ban iaka kmie, namar kata u lah ban hikai bha iaki khun ban kren donakor bad burom ia kiwei.
8. LONG U PARALOK BA JAN TAM BAD KI:— Ban long kum u paralok kadei ka lynti kaba biangtam ban iajan bad ki khun khamtam ynda ki la heh la san. Ki khun kilah ban pynsngew ia kaei baki thmu ban ong bad ki kham sngewshngain khamtam lada u kpa u long kum u paralok uba kilah ban iasam jingmut lang. Da ka jingiajan bad ki phi lah ruh ban ai jingmut iaki kaba lah ban ai jingmyntoi iaki ynda ki la heh la san.
   Namar kata u kpa u shim iaka bynta kaba hakhmat haka jingim ki khun , u dei ban don ka jingkitkhlieh naduh ba ki dang rit. Borabor phin shem ba ka jingim jongki khynnah bymdon kpa la iapher na kiwei pat kiba don. Kim sngew shngain halade bad ka jingdiaw mynsiem ka ju wan borabor, namar kata kum u kpa phi dei ban sngewthuh iala kijong ki khun bad don ka jingkitkhlieh naka bynta jongki khnang ba kin ioh iaka jingim ba pura, ka met kaba koit ba khiah bad ka mynsiem ba kmen.
   Khublei…..