U Khasi, u dei uba sahdien tam, ong ki nongpynmih sohtrun

Umdihar:Ka jingpaw nam ka sohtrun na kane ka jylla khamtam na ri Bhoi, ka la siew dor mynta bad kane ka urlong hadien ba ka Umdihar Integrated Village Cooperative Society.
Kane ka Society, kaba la seng ha u snem 2017, ka la lah ban pynieng ia ka karkhana sain sohtrun lyngba ka jingiarap na ka sorkar bad la pyn iaid iew ia kine ki sohtrun da ka jing iatreilang bad ka kom peni na Bangalore, ka IQF, Bangalore.

Ha ka jingia kren bad ka secretary jong kane ka Society, ka kong Mary June Shylla, ka la iathuh ba naduh shiteng u bnai Jylliew haduh u bnai Nailar, la lah ban shalan 27 ton u sohtrun bad ia kine ki sohtrun la iarap die bad shalan ka kompeni IQF sha ri Europe. “Ngim pat lah ban shalan hi da ka Society, namar ba ngim pat don ka License, bad ngi hap ban pan jingiarap na kiwei, namar kumba phi tip, u Khasi u dei uba sahdien tam”, la pynpaw ka kong Mary June.

Ia ki sohtrun la wanrah na baroh ka thain ri-Bhoi, bad la wanrah ruh na thain Mawkyrwat bad na Garo Hills.
“Kane ka dei tang ka jingpyrshang shwa bad ym pat sngewthuh ia ka jingioh nong ne duh nong”, la ong kong Mary.
Mynshwa ha ka por bym don ka karkhana, ki bun bha ki nongrep sohtrun hynrei kam pat biang ka iew bad ka dor ka tad bha hynrei mynta da ka jingdon kane ka karkhana ka lah ban thied ha ka dor kaba kham biang.

Ka donkam 7 ton ban sain (process) ia u sohtrun bad ban kit bad palat ia kata, kam lah shuh ban leh hynrei ha kine ki sngi, namar ba ka jingduna ka sohtrun, la hap ban pynshong sngi shwa ia ka karkhana.
“Ia ka sohtrun lah ban thied lada don kiba wanrah ha ka dor 14 tylli shi kilo”, la iathuh ka kong Mary.
Kane ka Society mynta ka don kumba 200 ngut ki nongrep ha shnong Umdihar bad ka la ai jingmyntoi shibun ia ki, namar ba ka ai ruh ka ram ia ki jingdonkam jongki. Ha kaba nyngkong, ka don shibun ki jingeh hynrei lyngba ka jingleit pynshai bad pynsngew ia ki nongshong shnong, ka la nang roi nang san haduh kine ki sngi.
“Teng teng hap iam namar ba mad ia shibun ki jingeh hynrei mynta ka la sdang ban sei soh”, la ong ka kong Mary June, bad bynrap, “Ka Society ka la lah ban iarap da ka ram ia ki nongrep ryngkat ka sut kaba rit bad ka lah ban ai ram haduh 8 lak’.

La iathuh ba ka thong jong kane ka Society kaba dei kum ka Society ka shnong, ka long ban sain (process) nalor ka sohtrun, sa u sying, shynrai bad kiwei ki mar rep.
“Ka jingmyntoi ka long ba ki nongrep kin ioh jingmyntoi bad ban ai kam ai jam ia ki samla ka shnong”, la ong ka kong Mary June.
Ym tang ban sain ia u sohtrun hynrei ka la don ka thong lada ioh ia ka jingiarap, ban sei ksai na u sla sohtrun khnang ba kan long shuh ka jingmyntoi ia ki nongrep, nalor ka jingioh ia ka soh.