U John Roberts, kum u nong pynkylla Khasi ia ka Baibl, ha u snem 1891

Shillong:Ka John Roberts Theological College, Mawklot, Shillong ka la pynlong ia ka “Rev. Dr. John Roberts Memorial Lecture” ha ka 23 tarik u Naitung, 2022 kaba hap ruh ka lyngkhuh sngi iap kaba 114 jong u Rev Dr. John Roberts.

Ha kane ka sngi la pdiang sngewbha ia ki shah khot sngewbha bad ki samla pule da u Rev Dr.B.L.Nongbri, (Principal) uba iathuh lyngkot ruh ia ki matti kiba u Rev. Dr. John Roberts u la leh ha kaba seng ia ka Cherra Theological College ha u snem 1887 ha Sohra (Ia kane ka College la pynkynriah sha Shillong ha su snem 1994 bad la tip pat mynta kum ka John Roberts Theological College). Shuh shuh la pynpaw ruh ba u la don ka bynta kaba khraw ha kaba pynjanai bad pyndep kum u general editor ia ka translation ia ka Bible sha ka ktien khasi ha u snem 1891.

Kawei pat ka jingnoh synniang kaba khraw ka jong u sha ka jaidbynriew Khasi Pnar ka long ha kaba buh ia ka nongrim kaba skhem ia ka Khasi Literature lyngba ki Khasi Readers II, III & IV kiba u la pynmih. Kine ki Readers ki kynthup ha ki, ia ki symbai jong ka thoh poetry khasi, ki drama, ki khana lyngkot bad kiwei kiwei. Na ka bynta kane ka matti kaba khraw kaba u la leh, la pynkup burom bad ithuh ia u, kum U Kpa ka Khasi Litarature.

Nalor kane, kum shi bynta ia ka jingkynmaw burom ia u, la don ka jingbuh syntiew ha u bust jong u Rev.Dr. John Roberts da u Rev. C.Syiem, President ka Governing Board, Prof. Esther Syiem, NEHU; Mr. P. Kharshiing, Finance secretary, Khasi Authors Society bad na u Rev. Dr.B.L.Nongbri , Principal. La pynbud pat da ka jingrwaikyrpang ba la rwai da ka JRTC Choir “Ri Khasi Ri Khasi” kaba la thoh hi da u Rev. Dr. John Roberts.

Hadien jong kane, la ioh pat ia ka Rev. Dr. John Roberts Annual Memorial Lecture-2022 halor ka phang ” Voices of Resistance: Literature in English from N.E India” ba la ai da ka Prof. Esther Syiem , English Department, NEHU, Shillong. Ha ka jingkren, ka Prof. Esther Syiem, ka la plaid ia ka bynta kaba iar bad jylliew jong ka sainpyrkhat ki nongthoh kot trai ri (Indigenous Scholars) kiba pynshong nongrim ne kjit mynsiem na ki khanatang bad ki purinam jong ki longshuwa manshuwa pyrshah ne pher na kaei ba la thoh shaphang ki jaidbynriew riewlum da kiwei pat ki nongthoh. Ka jingkren jongi ka la ktik jingmut bad ai jingkyrkhu shibun ia ia ki nongsngap bad ki samla pule baroh.