U Joe Biden la 90 snem, nga lei dang 72 snem, ong U Bah Bindo

Shillong:U nongaibuit rangbah ka United Democratic Party u bah Bindo M Lanong, u la ong ba wat la u la noh ka rta ruh, hynrei un dang lah ban ai ka jingshakri ia ki paid bah ha ka jylla kum u nongialam, sa ar samoi treikam eiei.

Haba ia kren bad ki lad pathai khubor u bah Lanong u la ong “Ngam don eiei ban ong, halor ka jingpynkhreh ka party UDP na ka bynta ka election 2023, namar ba ngam don shuh ha khmat jong ka party UDP bad kiba bun ki kam kim pyntip shuh ia nga”.

“Ka jingrai ban ym ai tiket ia nga, nga khlem khmih lynti namar ba ki khlem ai ka daw ba biang ia nga, lada ki ong ba ngim long shuh ngi la tymmen lane ngi don dak lane ngi la bud nam ki donhok ban pynduh tiket lada don kum kita”u la ong u bah Bindo.
“Nga ia lade sa ar samoi treikam ka sorkar ruh nga dang biang lada u Joe Biden u ba la 90 snem ka rta u dang long ban pyniaid ia ka Ri America, nga lei dang 72 snem ka rta hato ngam lah, u Myntrirangbah ka jylla Mizioram ruh u ba la 90 snem, hynrei u pyniaid ia ka jylla”u la bynrap.

“Mynta hi nga dang shait dang khlain, dang biang ka bor pyrkhat, ka jingtip bad ka jinglong kaba biang shibun ban ia kine ki nongialam baroh ki ba mynta bad imat ka dei ka jingduna jingtip lane aka jingbym sngewthuh ia kaei kaba ki leh, ngam sngew eiei”u la ong.
U bah Lanong u la iathuh ruh “U President ka UDP u la kren shai ba un ym ai tiket shuh ia nga, hynrei nga la rai ban iaid shakhmat, hynrei ngam pat lah ban ong la ngan pyniasoh ia lade bad kano kano ka party lane ngan ia khun kum u kyrtong shimet, hynrei sha Nongkrem Constituency hi nga la iaid shait shait, la ki ai ne kim ai tiket ruh namar ngam lah shuh ban lehbein ia ki paidbah bad ia kiba ia trei lang bad nga”.

“Naduh u bnai ba ar hi la mih kane ka jingartatien la kin aitiket ne em ia nga, bad nga la ong ba ap ba ka party kan shim rai, namar ba ngam sngew dei ba ka party kan pynduh tiket ia nga, kumba ka long mynta nga dei u ba la rangbah tam ha UDP, nga la don ha ka party APHLC ha u snem 1983 kum u MLA, nga la don ha ka party HPU ha u snem 1994, nga la don ha ka UDP ha u snem 1997 ba seng ia ka ruh”u la bynrap.
“Kino na pdeng kine ki nongialam ba hakhmat mynta ha ka UDP ki la don ha ka UDP ha kato ka por, U bah Jemino Mawthaw, U Bah Paul Lyngdoh, u Metbah Lyngdoh em kim don naduh 1997 ki wan hadien, te kim tip eiei ia kine ki political history,te ki bym tip ia ka political history te kin bakla beit” la ong u bah Bindo.

U bah Bindo u la ong ruh “Ha u snem 2008 ka la don ka jingiapan tiket na ka kynhun u Dr Jemino ban ia khun pyrshah ia nga, ha kaba u nongialam ka UDP u Dr Donkupar Roy u la ong, ba nga dang lah ban duh ia ka Constituency ban ia kaba nga duh ia u bah Bindo, nga la iakhun bad nga jop, kum uta kein u dei u rangbah nongialam”.
“Ki nongialam ka UDP mynta ki mut ban ai tiket ia u briew u ba la shang kylleng kylleng, ki mut ban ai tiket ia u briew u ba la ialeh na ka KHNAM, na ka Congress, kum u kyrtong shimet, u bym don ruh ha ka party UDP wat tang ban pyniasoh ruh um treh bad ka party, hynrei ki mut ai tiket ia uta, u ba nga sngewthuh ba un ym lah ban poi shano shano ruh”la bynrap u bah Bindo.