U Jisu Khrist, un dei u khla ba thymmai ha ka law kyntang, ong U MDC La suit la shor U Phadar Sngi ia ka Law kyntang ha Mawbri

Shillong,17 Naitung:
Mynhynin ka sngi , ka sngi ba u phadar Sylvannus Sngi Lyngdoh, u Sohblei ba nyngkong jong ka Mawbri Parish uba la tip paidbah kum u Phadar sngi u la suit la shor bad pynkyntang ia ka law kyntang ba ki phadar ki la buh ha Sohliya kaba hap hapoh ka Mawbri Parish .U MDC ka Umroi Constituency u Bah Fabian Lyngdoh, u la ong ba kane ka law kyntang ba ki phadar ki la buh ha katei kajaka ka long kaba ai jingmyntoi bad kaba donkam ia u paidbah jong katei ka thain baroh kawei ha kaba lyngba kine ki law kyntang kiba la thung dieng thymmai, ki long ruh kum ka jingpynsah ia ki um ki wah bad ki lyer ba khuid kiba lah ban ring mynsiem. Hynrei ha kajuh ka ka por utei u MDC u la iathuh khana lyngkot ruh shaphang u Diengiei uba ki baroh ki la tip shaphang jong u ha kaba mynhyndai haba ki khun khasi ki la pyrshang ban pom ia u bad kim shym la lah naba u khla u la wan jliah bad u dieng u la dap doh biang, da kaba kynthoh ruh ba katei ka dei ka jaka ba u tei u khla u la ri la sumar ia uta u dieng iei bad hadien ba la kyllon noh u dieng iei la mih pat sa ki jutang ban ia tang noh da ka ka law kyntang ha kaba u khla u dei u ryngkew bad u basa ban iada ia kata ka law lyntang. Utei u MDC ka Umroi u la ong ba kane ka law kyntang ba ki phadar ki la plie bad khap ribon thymmai, ka long ka lawkyntang ba ym dei shuh da u khla ban long ryngkew basa, hynrei un long u Jisu Krist kaba mut ba u Jisu krist u dei u khla ba thymmai, katei katei ka lawkyntang ka ban shong ki bsein ki thliem bad kiwei pat ki jait jingthaw ong u Bah Fabian Lyngdon, MDC Umroi.
Ha katei ka sngi wat la hapdeng ka jingpynthut u lapbah la ioh ruh bun ki jingkren na ki phadar, u khraw pyrkhat ba paw ka Ri Khasi u Dr.J S Shangpliang bad kiwei. La suit la shor ruh ia u Mawbynna jong ka law kyntang da u phadar sngi.