Shillong: Ka seng kaba don sha ka liang pyrshah ka seng Congress ka la pynbna ia ki kyrteng ba khadduh jong ki 12 ngut ki kyrtong, ki ban iakhun ia ka elekshon sha iingdorbar thawaiñ jong ka Garo Hills Autonomous District Council(GHADC).
Kum ban shu pynkynmaw ia ka tarik jong ka elekshon na ka bynta ka GHADC la dep ban pynbna da ka Sorkar Jylla ka ban sa long ha ka 9 tarik u Iaiong 2021.
Katkum ka thup, ki kyrteng jong ki kyrtong ki ban iakhun ia kane ka elekshon bad ki konstitwensi jong ki, ki long U James Sangma na Babelapara, Stevie M. Marak na Boldamgre, Jagadish Ch Hajong na Zikzak, Sanjay Koch na Betasing, Malcolm M. Sangma na Rochonpara, Agassi R. Marak na Balachanda, Ashahel D. Shira na Batabari, Habibuz Zaman na Shyamnagar, Joyson R. Marak na Raksamgre, Levastone T. Sangma na Jengjal, Manseng Momin na Bolsong bad Lahitson M. Sangma na Samandagre.
Dang shen, ka seng Congress ka la pyllait ia ka thup kyrteng kaba nyngkong jong ki 17 ngut ki kyrtong na ka bynta ki 17 tylli ki district council counstituencies.
Ka GHADC ka don 30 ngut ki nongmihkhmat, ha kaba 29 ngut ki dei kiba la shah thied da ka jingiathep vote bad uwei u nongmihkhmat pat u dei u ba la shu thung da u Lat.
Ka jingniew ia ki vote kan long ha ka 14 tarik u Iaiong 2021.
Ka jingiathep vote kan sdang naduh ka por 7 baje mynstep bad kan kut haduh ka por 4 baje janmiet.
Ka jingshakri kaba san snem ha GHADC ka la kut noh ha ka 18 tarik jong u bnai Risaw, 2020.
Hynrei na ka daw ka khlam Covid 19 ym shym la ioh satia ban pynlong ia kane ka elekshon bad ka GHADC kan wan hapoh ka jingsynshar jong u Lat kumba 6 bnai bad ka ban kut pat ha ka 18 tarik u Iaiong 2021.
Sngewbha da pynshai khnang ban nym kulmar ki nongpule. Hato uta u James Sangma dei u hynmen u Conrad Sangma ne uei ????