U Himanta, u dei ban hiar shuki, ba u pynshit ia ka thain shatei mihngi, ong ka Congress

Shillong:Ki nongialam jong ki samla Congress na Nagaland, Mizoram, Meghalaya, Manipur & Arunachal Pradesh, ki la pynmih khubor myn hynnin ka sngi bad pynrem halor ka jing thombor jong ka sorkar Assam, ia ki jylla ba marjan, ha kine ki bun bun snem mynta. La ong shuh shuh, ba naduh ba u shimti U Himanta Biswa Sarma, kum u myntri rangbah ka Assam, kine ki jingjia, ki la nang jubor bad ki pulit ruh, ki nang iai na ka por sha ka por.

Ki riew paidbah, kiba shong ha khappud jong ka Assam, ki ju mad ia kine ki jingeh, ha kaba ki jaka rep jaka riang jongki, la ju pynjot da ki pulit Assam.

Kine ki jingjia, ki pyni shai halor ka jing bym larkam jong ka kynhun North East Democratic Alliance (NEDA) bad ki jing shisha, ki kdew, ba ka NEDA, kam dei ban pyn ia tylli ia ka thain shatei lam mihngi, hynrei ka dei ban knieh da ka bor ia ka thain shatei lam mihngi, lyngba ki kam thombor jong ka BJP lan ka National Democratic Alliance (NDA).

Ki nongialam samla jong ka Congress, ki kynnoh ruh ba u dei U Himanta Sarma, uba pynklang ia ka ding sha ki jylla ba marjan jong ka thain shatei mihngi, namar ba ka dei hi ruh ha ka por jongu, ba ka jing ia kynad ka jur bha bad ka jingthombor ka jur bha na ka liang jong ka Assam sha kiwei ki jylla jong ka thain shatei lam mihngi.

“Ngi shim ba U Himanta Biswa Sarma, um bit satia, ban long kum u myntri rangbah ka Assam bad ngi dawa, ba dei ban weng noh, ia u, na katei ka shuki, ba kan wan biang ka suk ka sain ha ka thain shatei lam mihngi” ong ka kyrwoh, ba la phah da U Geli Eti, President Arunachal Pradesh Youth Congress, Mahananda Nungleppam, President, Manipur Pradesh Youth Congress, Richard Mrong Marak, President, Meghalaya Pradesh Youth Congress, Dr. Lalmalsawma Nghaka , President, Mizoram Pradesh Youth Congress, Limayangba Longkumer, President, Nagaland Pradesh Youth Congress.