New Delhi: U Harivansh Narayan Singh, uba dei u kandidet jong ka seng synshar ka National Democratic Alliance (NDA), ula shah jied mynta ka sngi, kum U Deputy Chairman ka iing dorbar Rajya Sabha, ha kaba ula pynliem ia u kandidet jong ki liang pyrshah, U B.K. Hariprasad.
U Harivansh, u dei uwei na ki nongthoh khubor ba pawkhmat jong ka Bihar bad u mihkhmat na ka seng Janata Dal-United (JD-U) ha ka iing dorbar Rajya Sabbha bad ula jop da 125 pyrshah ia 105 vote.
Ka jingdon ki dkhot ka Rajya Sabbha mynta ka long 244ngut bad kiba shim bynta ki long 230ngut. Ka Aam Aadmi Party (AAP) bad ka YSR Congress party kim shym la shim bynta satia ha kaba thep vote.
La synran ia U Harivansh, hadien ka elekshon sha ka jaka shong jongu, da u nongialam jong ka iing dorbar Rajya Sabbha, U Arun Jaitley, U Ananth Kumar, myntri kam iing dorbar bad U Ghulam Nabi Azad, nongialam liang pyrshah.
U Narendra Modi, myntri rangbahduh, u ai khublei halor ka jingjop U Harivansh bad u iathuh ba U Harivansh, u dei u briew, uba la pule bha bad uba la thoh ruh shibun ki jingthoh ba kordor.