U Garo uba 8lak, U Khasi, Jaintia, uba 13 lak, pyrshah bhah kam ka HYC

Shillong:Hadien katto katne bnai, ba ka ïing bishar Meghalaya High Court ka la pynmih ïa ka hukum ba ka jingpyntreikam ïa ka State Reservation Policy dei ban don ïa ka Roster System bad na ka liang pat ka sorkar jylla, ka la lah ban pynkhreh ïa kane ka Roster System bad kaba ka kynhun Myn tri ka la ai jing mynjur ruh ha ka 10 tarik jymmang 2022.

Na ka liang ka Hynniewtrep Youth Council (HYC), mynhynnin ka sngi hapoh ka jingïalam u President u Bah Robertjune Kharjahrin bad u Bah Roykupar Synrem u General Secratary ki la leit ban pynsngew ïa ka jingbympdiang jong ki, ïa kane ka Roster System ba la mynjur da ka sorkar jylla, ha khmat u Symbud Myntri Rangbah ka jylla u Bah Prestone Tynsong, ban pyrshah ïa ka jingpynbeit thymmai, kat kum ka bhah ka roster na ka bynta ki department bapher bapher ha ki district bad ki sub- division. Ka HYC, ka pyrshah jur ruh ban ai kajuh ka bhah, namar ba U Garo, u don tang 8lak ngut, katba U Khasi Jaintia, u don haduh 13lak ngut ki nongshong shnong.

Haba kren sha ki lad pathai khubor, u Bah Robertjune Kharjahrin, u la ong ba ka bynta kaba kongsan eh kaba pynlong ïa ki ban pyrshah, ka dei halor ka point F jong ka Office Memorandum kaba la pynmih da ka sorkar jylla dang shen, namar ha kane ka bynta jong ka point F, ki don pat ki kyndon kiba la kdew ba ïa ki post Grade 3 ne Grade 4 ka dei beit ban thungkam 80% kyllum ïa u Khasi bad Garo, hynrei kane ka kyndon ka kdew ruh ba kine ki 80% yn thung da ki Garo ne ki Khasi lada ym don Khasi ba aplai ha Garo Hills bad lada ym don Garo ba aplai ha Khasi Hills. “Lada kheiñ pat ïa ka jinglong jingman jong ki district ha jylla, u khasi ba don sha garo hills te u duna, katba u Garo ba shong shnong pura shane pat u lah jan poi da ki lak, ha kaba ka sngi te kamut kan long kumjuh hi, un ïoh nong hi u Garo,” ong u Bah Robertjune. Shuh shuh u la ong ba kane ka jingpynbeit kan wanrah ïa shibun ki jingeh bad jingkulmar bad kan long ka jingduh nong kaba khraw ïa u jaidbynriew Khasi.

U Bah Robertjune, u la bynrap ruh da kaba ong ba namar ka Reservation Policy ka la noh shiliang palat, lada ym lah ban pynbeit thymmai kan sa wanrah jingeh kham bun shah pynban, bad ka jingïoh nong kan long tang ïa ki jaidbynriew Garo kiba kham duna paid.

Haba bynrap lang ïa kane na ka liang u General Secretary ka HYC u Bah Roykupar Synrem, u la ong ba ha kaba ïadei bad ka Office Memorandum u Symbud Myntri Rangbah, um pat lah ban jubab shai, namar hap donkam ban peit bha bad u kular ban peit bniah biang bad thaw lad da kumno ban pynbeit, bad yn sa khot biang sa shisien ban ïakren bad ki.