U Dr Syngkon u kyrtong MP, u Bah Ardent un pynleit jingmut ha ka jylla, rai ka VPP

Shillong:Ka Voice of the People’s Party (VPP) mynhynnin ka sngi, ka la pynbna ïa ka kyrteng u Dr. Ricky A.J Syngkon ban long u kyrtong ka Party na ka bynta ban ïakhun ha ka ilekshon MP, ka Shillong Seat, 2024.

Ïa kane la pynbna da u Dr. Kara Chen u badei ruh u Vice President ka VPP bad ula ong ba ka Party kan ïakhun marwei bad kan nym ïatreilang bad kiwei kiwei ki Party ne ki seng rilum.

U Dr. Kara ula ïathuh ba kane ka jingpynbna kloi ïa ka kyrteng jong u Dr. Ricky A.J Syngkon kadei na ka bynta ban pynkhreh ïa ki jingdonkam ban ïakhun ïa ka MP ilekshon 2024.
“Ka party ka la ïoh pdiang 2 ngut ki kyrteng ban ïakhun ha ka MP ilekshon hynrei na ka liang ka Party ka la ibit ïa u Dr. Ricky A.J Syngkon ban ïakhun ha ka MP ilekshon 2024 namar u (Dr. Ricky A.J Syngkon) udei ruh uwei u ba don bynta ban seng ia ka VPP.

“Kum ka state elekshon committee ka VPP ka la ïakynduh ha ka 16 tarik mynta u bnai ban rai ïa kane ka kam ilekshon MP na Shillong Lok Sabha Seat,” ong u Dr Kara haba ïakren bad ki nongthoh khubor.
U la ong shisien ba la rung ha ka rynsan ban ïakhun ïa ka ilekshon khlem pep ka seng ka shaniah ban ïoh jingjop.
“Ngin ïakhun ïa ka ilekshon bad ngim donkam ïa ka jingkyrshan jong kiwei pat ki political party. Ki don shibun ki mat bad ki kam kum ka Reservation Policy, ka ILP bad kiwei kiba yn ïasaid hapoh Parliament,” ong u Dr. Kara.

U la ïathuh ba la don arngut kiba pan tiket, kawei dei ka Dr. Bahunlang Tron, Prof NEHU bad u Bah Lakhon Kma, nalor ki katto katne kiwei pat.
“U Bah Syngkon u dei u nongseng ka VPP, u General secretary, u nonghikai NEHU. Lada u ïakhun na ka party un jop,” u la bynrap.
Ha kaba ïadei pat bad ka MDC ilekshon u Dr Kara u la ong ba ka dang long kaba eh ban pynbna kyrteng kyrtong kloi namar ka seng ka dang hap ban bishar ïa ki kyrtong kiba lah dep pan tiket naba ki la bun palat, ha kaba tang na kawei ka Konstitwensi ki don kumba 7 haduh 8 ngut kiba pan tiket.

Haba kylli pat ba balei u President ka seng u Bah Ardent Miller Basaïawmoit um ïeng hi dalade ban ïakhun ïa ka ilekshon MP, u Dr Kara Chen uba long ruh u Vice President, u la ong ba ka seng ka sngewdei ba un pynleit jingmut shwa hapoh ka Saiñ pyrthei ne saiñ hima sima jong ka jylla.