Shillong, 16 Nailar:
Ka jingsngap myn thi u Symbud Myntri Rangbah ka jylla ba peit ia ka tnad pule puthi, u Dr RC Laloo ka la pynlong ia ki nonghikai ban kynnoh ba um kit khia bad um khein snep satia ia ki.
U President ka Khasi Jaintia Deficit School Teachers Association (KJDSTA) u Bah ED Nongsiang u la ong hynne ka sngi Thohdieng, “ha ka jingsngew jong ngi, u myntri um kit khia ia ki nonghikai”,.
U Bah Nongsiang u la ong biang, “u Symbud Myntri Rangbah um kwah iakynduh ia ki nonghikai, um suid niew satia kumba ka paw ka jingleh jongu namar ba um ai jubab ei ei wat haba ki nonghikai ki la kwah ban iakynduh ia u”.
Hadien ba la wai ka jingialang ba shisien snem jong ki nonghikai KJDSTA hynne, u Bah Nongsiang u la ong ba haduh mynta u myntri um shym la jubab ei ei bad sa saw sngi ba ka jingai por jong ka JACATAM ia u kan kut la un khot ne em.
“Ka jingkwah iakynduh jong ngi, kam dei ban leit iasoh iadat hynrei ban iakren ia ki kam jong ka pule puthi ha kane ka jylla, kaba ngi sngew khia”, la ong u Bah Nongsiang bad bynrap ba lada u Myntri um khot iakynduh hapoh ka por ba la buh, ki nonghikai ha ka jylla kin sa shong pyrkhat ban kdat noh da kiwei ki lynti iaid.
Ha kajuh ka por, u la iathuh ba ka jingialang jong ki nonghikai KJSDTA ka la shim ia ka rai hynnei ban kyrshan ia ka rai jong ka JACATAM.
Kiwei ki rai ba ka jingialang ka la rai ka long ruh ban dawa beit na ka sorkar ban shimti tang ia ka kam hikai, ym ia ki skul. “Ngi dawa ba ka sorkar kan shimti tang ia ka kam hikai (provincialise) ym ban shimti ia ki skul”, la ong u Bah Nongsiang bad bynrap ba ka jingthmu ka sorkar ban shimti ia ki skul, kam dei satia ka jingdawa jong ki nonghikai.
Ha kane ka jingialang, u la iathuh ba la iakren ruh ban pynkynmaw biang ia ka sorkar ba ka dei ban pynlait tulop man u bnai sha ki nonghikai skul, ym ban pynlait shisien ha ka saw ne san bnai.
Shuh shuh kawei ka rai pat, ka jingpyrshah ka MBOSE kaba la thmu ban set ia ki jingkylli ia ki klas IX. Kane ka rukom leh ka MBOSE la pyrshah jur namar ba ka la phlop ne kam lerkam kumba la dep mad ha ki snem ba la dep. “Ngi kwah ba ia ki jingkylli na ka bynta ka eksamin jong ki klas, dei ban set da ki skul hi kumba ju long”, u la ong.
Mynshwa ha ka snem 2000 haba set jingkylli ka MBOSE ka la lait lypa shwa ban thoh eksamin, bad ngi shem ba kane ka jingleh kam long kaba biang, la bynrap u Bah Nongsiang bad bynrap ba ki khynnah ki hap siew ka bai jingkylli ruh kaba rem.
Phi don ban ong eiei?