U Dohkha phylla dei na America, lyngngoh ba poi ha Umiam

Shillong, 27 Nailur:
U trai jong u dohkha ba phylla ba la shu pynap jar na wah Umiam u bah Mathius Lyngdoh Lyngkhoi, haduh mynta u dang ri kyndong ia une u dohkha ba kham phylla.
Haba u nongaikhubor u la pyrshang ban wad jingtip halor une u dohkha la iathuh ba ia une u dohkha niar ban lap ha ka dong shatei lam mihngi bad kumjuh ruh ha Ri India hi baroh kawei.
Ki nongtrei jong ka Geological Survey of India (GSI), kiba la iohi tang ia ka dur ba la shon jong une u dohkha ki la iathuh ba une u dohkha u dei u symbai uba don ha ka Ri America bad ki la pynpaw ia ka jingsngew lyngngoh ha kano ka rukom u la wan poi ha Umiam.
La sngewthuh ba ki nongtrei jong ka GSI ki la kwah ban tip kham bniah ia une u dohkha bad kin sa leit peit bad ban pule kham bniah ia une u dohkha uba phylla ba la ioh na Wah Umiam.
Ki khubor ki iathuh ba u trai jong une u dohkha bah Mathius u la pyntip sha ki bor sorkar ba dei peit jong ka tnad Ri Dohkha jong ka Ri Bhoi District, hynrei kim shym la shimkhia satia na ka bynta ban leit peit ia une u dohkha.
La iathuh ba na ka liang jong u bah Mathius u la kwah ban die noh ia une u dohkha namar ban bam ruh ym i nud, namar ka met jong une u dohkha ka don tang da ki shiah suda; nalor kata ruh ban bam la I bynnud bad u la kwah ruh ba kin don ki briew ki ban buh lane ri kyrpang namar u dei u dohkha uba kham phylla bad u bym ju kham ioh koit.
Ia une u dohkha la la pynap jar da u bah Mathius uba shong ba sah ha ka shnong Umniuh Umiam Khwan kaba don hajan ka shnong Umbir hajan Umiam hi ha ka 24 tarik mynta u bnai.