U dewiong 10 ton hap siew khajna, 12 ton ba bakla kaiphod NGT

Shillong, 30 Naiwieng:
Hadien ba ka National Green Tribunal ka la ailad ia ki trai dewiong ba kin die ia u dewiong jong ki ryngkat ka jingsiew ia ka khajna shuwa ba kin die, ka la mih pat ka jingeh na bynta ki trai dewiong kaba ki nongialam ka State Co-ordination Committee of Coal Owners, Miners & Dealers Forum, hapoh ka jingialam jong u chairman u bah Sonny L Khyriem bad u Secretary u bah Mostophar Kharkongor ki la ong ba katei ka jingeh ka dei kaba la mih na ka daw ka jingbakla jong ka kaiphod ka komiti ka NGT, ha kaba ka jingdon u dewiong uba la dep khein bad pynbna u iapher bad ka jingsiew khajna kaba la pynshongdor. Ka SCCCOMDF ka la ong ba u dewiong uba la pynbna ba u don 10 ton, katba la pynshongdor pat 12 ton, kaba mut ba ki trai dew iong ki duhnong 2 ton.
Halor katei ka jingeh dang shen ki nong ialam katei ka seng ki nongkhaii dewiong ki la leit ban ia kynduh ia u chief Secretary ka jylla u bah PBO Warjri, u Chairman ba thymmai ka National Green Tribunal Committee, ban ai ia ka dorkhas bad ban ujor ia katei ka jingeh kaba mih. Ha katei ka jingiakynduh ki trai bad ki nongkhaii dewiong ki la dawa ruh na u chief Secretary ban pynmih noh ia ka kaiphod jong ka jingdon bad ka jingpynshongdor ia u dewiong ha ka thain Garo Hills kaba sah ryngheng haduh mynta .