“U DC Ri-Bhoi u Ejen ban shna lynti rel” kylli ka KSU

Shillong, 10 Jymmang:
Ka KSU ka la buh jingkylli hato u Deputy Commissioner ka Ri-Bhoi District u GP Gotmare u dei u DC ban peit ia ka jingeh ki paidbah ne u dei u Ejen ( Agent) lynti rel?. Katei ka dei ka jingkylli ka KSU halor ka jingkynthoh jong u DC ka Ri-Bhoi da kaba ong ba lada ka kompeni kaba shna lynti rel ka donkam jingiada ka bor District ka kloi ban ai ki lad jingiada ia ki. “Lada u DC ka Ri Bhoi u ong ba ka kompani kaba shna lynti rel ha Ri Bhoi ka dongkam ia ki jingiada, ki bor district ki long kiba kloi ban ai jingiada ia ki, hynrei ka jingkylli kaba mih ka long balei u DC um ai jingiada iaki paidbah kiba sah ha khappud bad ka Assam kiba mad iaka jingshah pyndik bad jingshah thombor” ong u Lambokstarwell Marngar President ka KSU Central Body da kaba bynrap ba haduh mynta ka KSU kam pat ia kynduh ia u DC ka Ri-Bhoi kumba u la kam.
Ula ong ba halor ka jingkam u DC ba ka kam ban shna iaka lynti rel kan sa sdang biang, na ka liang ka KSU kan iengskhem ha ka nongrim ban pyrshah beit bad kan nym ailad ban shna iaka lynti rel katba ka sorkar jylla kam pat lah ban shna ia ki ain ki ban iada iaka jaitbynriew na ka jingwan rung kyrthep ki mynder ri bad ki bar jylla.
Ha kaba iadei bad ka jingujor ejahar ka NFR ia ka KHADC bad KSU kiba la leit pynsangeh iaka kam shna lynti rel, U Lambokstarwell Marngar ula ong, “Ha ka jingshisha dei ma ngi ki ban ujor ejahar kylla ia ka NFR namar ka la shu leh donbor ban shna iaka lynti rel khlem da ioh jingbit shwa naka KHADC namar ki jaka ban shna iaka lynti rel ki hap hapoh ka Scheduled Area, hynrei ka tnad rel ka la shu thom da ka bor ban shna ia ka lynti rel”.