Bah Monarch Shabong
U Conrad Sangma, myntri rangbah ka Jylla, ula leit sha Bang ladesh lem bad ki katto katne ngut ki myntri jongu, halor ka nongrim ban ia kren ia ka khaii pateng bad katei ka ri ba marjan.
Katei kam dei ka jingleit kaba nyngkong, hynrei ki la bun kiba leit ruh kham mynshwa bad ha ka por jong U Mukul Sangma, kum u myntri rangbah, ula leit hi sha katei ka Ri ba markhap, tangba ngim tip, la ka don soh ne em, katei ka jingleit kaba mynshwa.
Ki don shibun ki mat, kiba dei ban iakren hapdeng ka jing iadei ka India bad ka Bangladesh bad kitei ki kynthup naduh ka jing ia long ia im mar khappud, ka jing ia burom para briew bad nangta ka shongsuk shongsain bad nangta sa ka khaii pateng bad kiwei ruh.
Halor katei ka phang, ngi iohi ba mynta ka jing ia burom para briew kam don satia bad ka shongsuk shongsain ruh kam don satia bad ia katei ki ar ngut ki myntri jongu, kiba leit lang, kiba kynthup ia U bah Banteidor bad U bah Lahkmen ki tip bha namar uwei ula im ha Bangladesh da ki phew snem mynshwa bad uwei pat, u dei uba shong ba sah ha khappud bad ki briew jongu, ki la mad ia shibun ki jing ia kynduh kiba sngewsih shi katdei.
Ngim tip, la u myntri rangbah, u ialam iano ha katei ka jingleit jongu (lait na kitei ki myntri), hynrei ula dei ban ialam ia ki nong synshar shnong, ki nongkhaii kiba dei na ki thain khappud bad kitei ki kynthup ia ki nongthied bad ki nongdie ruh kumjuh.
Haduh mynta ngi iohi ba u sikret na Bangladesh, ki jingbam khutia jong ki khynnah, ki tiar iing tiar sem, ki poi hi ha Shillong bad katei ka dei kaba U Sangma, un hap ban pyrkhat khia bha bad katei ka pyni, ba ka jing khaii beain, ka jur bha bad ba ki bor sorkar kim lah satia ban khang bad nangta ki don sa shibun bah kiba ngim donkam ban iakren lut.
Halor kane ka phang, ka donkam ka jing ia sngewthuh jingmut shwa hapdeng ki nongshong khappud ka India bad ka Bangladesh bad kan jin da la bha, lada kin don da ka komiti ia khaii hapdeng kiba ia sah marjan bad lyngba kitei, ka dei ban don ka jing ia shalan ia ki mar kiba donkam ha ka bam ka dih, ki tiar iing tiar sem bad ki shnong, kin ioh khajna, katba ki iahap jingmut bad nangta kin sa kit ban khaii kylleng ka Meghalaya bad ka Bangladesh bad katei kan ailad ba kin ia kamai malu mala bad ba kin nym mih ruh ki tiar khaii beain.
Ka jingdon ki BSF, kam iarap satia ia ka khaii pateng bad ki dei ban don da ki pulit jong ka Jylla bad kitei kin iatreilang bad ki riew paidbah, ban ia sngewthuh jingmut ha ki phang bapher.
Phi don ban ong eiei?