U CEM barim, un ia khun na War East, u khun Bah HDR na Sohiong

Shillong, 22 Nailur:
Ka seng Congress, ka la pynbna mynta ka sngi, ia ki hynniew ngut ki kandidet jongka, ki ban ialeh ia ka elekshon shiteng samoi bad kitei ki kynthup ia U bah Lambor Sing Nongrum, u ban ialeh na Nongkrem, U Bah Lamdibok Sumer na War East, uba dei ruh U Chief Executive Member barim jong ka Jaintia District Council, U Bah Nathaniel Osbert Rymmai, u khun jong U Bah HDR Lyngdoh, u ban ialeh na Nongspung Sohiong, U Bah Lambok Nongrang na Mairang, U Bah Ioanis Lyngdoh na Pariong, U bah Kimfa Marbaniang na Myriaw Rambrai bad U bah Moon Lyngdoh na Laban Mawprem.
La iathuh ba la shim ia ka rai ia kitei ki kandidet, ha ka jingialang, kaba la pynlong mynta ka sngi, ha kaba la khlieh da U bah DD Lapang, President ka Meghalaya Pradesh Congress Committee (I), ong ka kyrwoh na U Polycarp K Marak General Secretery ba dei peit ia ka kam elekshon.
U Bah SG Khongiong General Secretery ka East Khasi Hills District Congress Committee, haba iakren bad U Rupang, ula pynpaw, ba u don ka jingkyrmen kaba haduh 100 shah, ba ka seng Congress, kan ioh bat biang ia ka Nongspung Sohiong, kaba la iehnoh da U Bah HDR Lyngdoh, namar ba uba ialeh ha kane ka kynti, un dei hi u khun jong U MLA, uba dei ruh u myntri ka tnat poh iing. Halor ka Nongkrem, u iathuh ba la jied ia u samla Lambor Nongrum, namar ba u dei uba bit ban shimti ia katei ka lyngkor bad ba u long uba la pynkhreh ban bat beit tang ia ka shuki MDC bad ba un bat tang kawei ka kam, khlem kwah ban ialeh MLA.
Na Nongkrem, ki don arngut kiba pan tiket ba kynthup ia U bah Lambor Malngiang, MLA bad MDC barim jong ka Nongkrem bad U Bah Lambor Nongrum, u dei u nongkyrshan ba radbah jong U Bah Malngiang, ha ki elekshon ba ladep.
Ka elekshon sha kitei ki hynniew tylli ki Constituency ha hynriew tylli jong ka Khasi Hills District Council bad sa kawei ha Jaintia District Council, kan lah ban long ha ka 13tarik Nohprah 2016. Ka tnat District Council Affairs, kam pat shym la pynmih ia ka jingpynbna kaba shai halor katei ka elekshon, namar ba U Lat ka Jylla, um pat ai jingmynjur satia halor katei ka jing tyrwa jong ka sorkar Jylla.