U bnai, u dei ban long ka ri jong ki hindu, ong U Swami

U Swami Chakrani Maharaj, U National President, ka All India Hindu Mahasabha, hynnin ka sngi, u dawa, ba dei ban pynbna, ba u bnai, u dei ban long ka ri jong ki hindu, lane ka “Hindu Rashtra” bad u kwah ruh ba dei ban leh kyrkieh noh, ha shwa ba kiwei ki ri, kin kam trai ia u bnai.

“Nga kwah ba ka India, kan pynbna noh ba u bnai, dei ha ka Hindu Rashtra bad ia katei ka rai, ban shin da ka Parliament,” ong u nongialam hindu, haba kren da ka video, ha ka X (lane kaba la tip mynshwa ka Twitter).

Ha ka video, u ai khublei ruh ia U Narendra Modi, myntri rangbahduh, uba la ai kyrteng “Shiv Shakti Point” ia ka jaka kaba u leit hiar khyndew, u Chandrayaan-3 bad ula ong ruh, ba ia katei ka jaka, dei ban pynbna, kum ka nongbah, ban tei ia ka ri jong ki hindu.

U thoh, shuh, da kaba ong “Ia u bnai, dei ban pynbna, kum ka ri jong ki hindu, da ka ain jong ka Parliament bad ka Shiv Shakti Point, kan long ka nongbah, ba ki ehrang, kin nym lah ban poi shuh, sha katei ka jaka, da ki kam shitniam jongki”.