U Blei um khmih kumba khmih u briew

AIS SUJA

“U Blei um khmih kumba khmih u briew”. Kane ka long ka jingshisha. Namar u Blei dalade hi u ong – ki jingmut jong phi ki iapher na ki jingmut jong nga, ki lynti jongphi na ki lynti jong nga. Isaiah 55:8-9.

Kumta, hangne ngi iohi shai kdar ka jingiapher ka jingmut jingpyrkhat hapdeng u Briew bad u Blei, kata ha ka por ba u Blei u la kyntait noh ia u syiem Saul ban long u syiem ha Ri Israel, kata hadien u snem 1050 B.C hadien ba ki Israel ki la jied ia u Saul kum u Syiem jong ki.

Hadien ka jingkyntait noh jong u Blei ia u syiem saul, u Blei u la ong ha u Samuel, ngan phah ia me sha u Jesse u NongBethlehem naba Nga la khreh ia nga ia u Syiem napdeng ki khun shynrang u Jesse. U Samuel u la ong kumno ngan leit? Lada u Saul u iohsngew ne un tip shaphang kata? (ha kato ka por u Blei u dang pdiang ia ka jing knia da ki mrad). U Blei u la ong to khot ia u jesses ha kata ka jingknia (Sacrifice) te ngan sa iathuh ia me. U Samuel ruh u la leit sha Bethlehem (ha ka shnong ba la kha ia u Jisu). Haba u Samuel u la poi ha Bethlehem, u la pynkyntang ia u jesse bad ia ki khun shynrang jong u.

Haba ki khun shynrang u Jesse ki la wan poi, u Samuel u la iohi ia u Eliab, bad u la ong halade, shisha imat dei une uta uba la sleh u Trai ban long syiem. U Blei haba u la iohi ia ka jingmut u Samuel, u la ong ha u Samuel WAT KHMIH IA KA KHMAT JONG U, LYMNE IA KA JING JRONG KA RYNIENG JONG U: NAMAR NGA LA KYNTAIT IA U: NABA U BLEI; UM JU KHMIH KUMBA KHMIH U BRIEW: NABA U BRIEW U IOHI TANG IA KA DUR KABA SHABAR, HYNREI U TRAI U IOHI IA KA DOHNUD. 1 Samuel 16:7.

Ha ka jingiohi u Samuel te u dang tharai ba u Eliab un dei uta uba la sleh ne u ba la jied jong u Blei hynrei kam long kumta, Na kata kadaw u Blei u kren ha u Samuel ia ki tei ki kyntien haneng ba u Blei um khmih kumba khmih u briew. Lehse kadon ka jingduna ha u Eliab ne ha kiwei pat ki khun u Jesse. Haba u Blei u la kyntait ia u Eliab, u Jesse u la phah khot ia ki 7 ngut na ki khun shynrang jong u. Bad u Samuel u la kylli – ki khun jong me baroh tang kine? U Jesse u la jubab – u dang don sa u ba khadduh, u dei u nongsharai langbrot, u Samuel u la phah khot ia u. Haba u la wanpoi, u Blei u la ong ha u Samuel; ko Samuel, to khie to pynsleh ia u NAMAR U LONG U NE KEIN U TA,…. Bad ka kyrteng jong u ka long u DAVID. Markumta u Mynsiem u lawan ha u David naduh kata ka sngi.

Kaei kaba ngi iohi hangne ka long ba u Blei u tip biang biang ia uta uba u hi u la jied. Wat la ki briew ne ki kmie ki kpa kim mutdur ia uta. Kumta u Samuel u la shim ia ka umphniang bad u la pynsleh ia u David napdeng kita ki hynmen (brothers) jong u baroh. 1 Samuel 16:13.

Kumta, ngi iohi kum ki briew barabor ngi khmih ia u briew tang nabar, ngi iohi ia ka jingbha dur iaka jinglehkhuid, ia ka jinglieh ki bniat, katba ngim tip ka dohnud jong u ka long ka ba iong (dark).

Kumta ruh, u Blei u la shim noh ia ma jinglong syiem na u Saul, u syiem ba nyngkong eh jong ki Israel. U Blei u la ai pat ia ka jinglong u syiem ha ki kti u David u khun u Jesse. Kumta u David u la long u syiem halor ki Israel ha ka snem 1010 B.C.

To ngin kynmaw, ba u Blei um khmih kumba khmih u briew, namar ki lynti jong u kip her na ki lynti u briew bad na ki jingmut jong u briew. Isaiah 55:8-9.