U Blei, ula kyrkhu ianga bad ngan lehbha ia kiwei: Honsen

Shillong, 10 Nailur:
Ka Meghalaya Bharat Scouts and Guides, kan pynlong ia ka jingialang kaba nyngkong eh jong ki Scouts and Guides Education Congress ha Pinemount Ridge, hajan Pinemount School, Shillong. Na ka jingiathuh jong I Kong A Swer, Secretery ka Meg halaya Scouts and Guides, ka jingialang, kan sdang ha ka 24tarik Nailur 2014 bad ha katei ka jingialang, kin don 350ngut ki Scouts and Guides, ki ban wan shim bynta lang. Nalor kito ki ban wan shim bynta lang na ka dong shatei lam mihngi, kin don ruh ki ban wan na ki bynta jong ka Asia Pacific.
Ka mat jong katei ka jingialang, ka long “Scouting and Guiding Education for Life” bad ka jingthmu jong ka jingialang, ka long ban pynshlur ia ki samla ha ka pule puthi, ban ai bor ia ki samla bad ban pynkhlain bor ia ka Ri bad ban pynshlur ruh ia kiba bun ki samla, ba kin shim bynta ha katei ka kam shakri paidbah jong ka Scout and Guides. U Bah GG Pariat, uba dei u dkhot ba rangbah jong ka Meghalaya Bharat Scout and Guide, ula kren shai ba ka jingpynkhreh, ka iaid shakhmat, ba ka jingialang, kan long kaba iaid beit iaid ryntih.
Ha kawei pat ka liang, ka Meghalaya Bharat Scouts and Guides (MBSG), ka la ioh mynta ia ka rynsan ialehkai jongka, ha kaba la ai sngewbha da U Bah Honsen Lyngdoh Mawphlang, uba la ioh ia ka khusnam National Citizen’s Award.
U bah FR Kharkongngor Chief Chief Commissioner jong MBSG, ula ai jingiaroh ia U bah Honsen, namar ki kam shakri paidbah jongu, kiba la iai bteng ha ki bun bun snem ba ladep.
U Bah Honsen Lyngdoh, uba don lang ha katei ka jingialang, ula kren lyngkot katto katne, hynrei, la pynthut ia ka jingkren jongu, da u kongsan, uba la poi slem sha ka jingialang. Hadien ka jingialang, ula ong “Ngam kwah ban iathuh paidbah ia ki kam kiba nga la don bynta ha ka imlang sahlang, khamtam ia ki duk ki rangli, namar ba U Blei, ula kyrkhu ianga na ka jingduk bad sha ka jinglong kaba nga long mynta bad kumta ka dei ka kam jongnga ban ai burom ia u, da kaba leh bha ia kiwei pat” ong U Bah Honsen, haba iakren bad u nongthoh khubor.