“U Blei uba im, u kren!”

AIS Suja

U Blei uba im, u kren! U Blei haba u la lah kren mynhyndai ha ki kpa tymmen da ki bun bynta bad rukom ha ki Nongiathuhlypa, ha kine ki sngi ba khaduh u kren ha ngi ha u khun (Jisu)” Hebru 1:1.
U Blei u ju kren ha ki sur bajam ha ki Kpa tymmen hyndai: ha u Adam u Blei u ong – Ko Adam me do haei? Ha ka Im u Blei u ong – “Kaei kane ia kaba pha la leh?” u ong ha u Adam – “Namar ba me la shah shkor ia ka ktien a tnga jong me, bad me la bam na uta u dieng, ia uba nga la adong ia me, da kaba ong men ym bam na u, te ia ka khyndew la tim na ka bynta jong me, da ka jingshitom men bam ha baroh ki sngi ki rta jong me” Genesis 3:9-17.
Ha u Abraham, u Blei u ong – “Ngan kyrkhu ia kita kiba kyrkhu ia me, ngan tim ia kita kiba tim ia me” Genesis 11:3. U Blei u la kren shuh shuh ha u Abraham – “To tip shisha ba u symbai jong me un long nongwei ha ka ri ka bym dei ka jong ki bad kin shakri ruh ia ki bad kita, kin pynshitom ia ki 400 snem” Genesis 15:3.
Ha u Noah u Blei u ong – “To thaw ka iinglieng da u dieng Kopher, ia ki pulit (kamra), men thaw ha kata ka iing lieng, men tah ia ka da ka bsiang shapoh bad shabar” Genesis 6:14.
Kum kine kiei kiei u Blei uba im u kren, ha ka jingtynshain bad ka sur bakhraw na bneng. Ha u Daniel pat, u Blei u phah da u Angel Gabriel bad u la ong – Ko Daniel, nga la wan ia ka ban pyllong ia me, uba nang ha ka jingsngewthuh” Daniel 9:22. Ka mut ba u Blei u phah ia u angel Gabriel sha u Daniel.
Ha ki Nongiathuhlypa pat kum u Amos, u Blei u la phah ia ki ban iathuhlypa ia kiei kiei ki ban sa jia long ha Israel. U la pynbna da kaba ong – kumne u ong u Trai, shaphang ka Damascus. Kumne ong u Trai, shaphang ka Gasa, kumne ong u Trai shaphang ka Tyros. Kumne u ong u Trai shaphang ka Edom, bad kumta ter ter. Amos 1:3-6.
Ka daw ka long, namar u Blei um kren shuh da lade kum ha u Adam, Noah, Abraham bad kiwei. Don ka por u Blei u phah da u angel Gabriel bad da ki Nongiathuhlypa kum u Amos, Isaiah bad kiwei ban pynbna ei ei na u Blei. Kumta u Blei u la kren da ki bun bynta bad bun rukom. Dalade, da ki angel, bad da ki nongiathuhlypa. U Blei uba im um kren ia ki maw ki dieng ia ki mrad ki mreng, hynrei u kren sha ki bynriew jong ka pyrthei.
Hadien ki nongiathuhlypa kiba ong – “Kumne u ong u Trai, kumne u ong u Trai, jar, ym don Nongiathuhlypa shuh kiba pynbna ia ka ktien u Blei – kiba ong, kumne “U ong u Trai” namar ka don ka por jingsngapjar u Blei khlem kren ei ei shuh kumba 400 snem kata hadien u Malakhi, ka long ka por jingsngapjar u Blei (400 silence years).
Kumta hadien ba la kut ki 400 snem, u Jisu u la wan ban long briew sha kane ka pyrthei, u Jisu u la heh la san, u la samla bha, u la sdang ban leh ki ka phylla ki kambah (miracles and wonders), u la kren shaphang ka hima ki bneng. Une kein uta u khun ia uba u Blei u la phah naduh bneng sha pyrthei ban kren da lade shaphang ka hok bad ka Hima u Blei. Une u khun u Blei u la don naduh kaba mynnyngkong bad u Blei ha bneng. Ioannis 1:2. Namar ka jingieit bah ia ka pyrthei, u Blei u la phah ia la u khun (Jisu) ban pynim ia ka pyrthei da u. Ioannis 3:16.
Bad ngi iohi ba u Blei u la kren ha ngi, ha nga, ha phi da u khun jong u u Jisu Khrist lyngba ka ktien jong u, lada ngi ngeit, hynrei u bymgeit te u la rem lypa. Ioannis 3:18.
U Jisu u la kiew noh sha bneng ha u lyoh: ki kam Apostol 1:9. Shwa ba un leit sha bneng, u la kular ban phah sha kane ka pyrthei da uwei pat u ban kren ban pynshai ia ki briew, uta u dei u Mynsiem Bakhuid (Holy Spirit) jong u Blei.
Shwa ba u Jisu um kiew sha bneng, u ong – Ngam iehnoh khun swet ia phi: NGAN WAN PAT HA PHI”. Ioannis 14:18. “Uta u nongpyntngen, u Mynsiem BAKHUID, ia uba u Kpa un phah ha ka kyrteng jong nga: uta kein un hikai ia phi ia kiei kiei baroh”. Ioannis 14:26.
Mynta ngi iohi ba u Blei ym tang ba u kren da lade, lane da ki angel jong u, lane da ki nongiathuhlypa, lane da la u khun jong u u Jisu Khrist, hynrei u Blei u la kren ha ngi mynta da u Mynsiem Bakhuid hadien ba u Jisu u la kiew noh sha bneng. Naduh ba u Jisu (U Khun) u la kiew noh sha bneng haduh mynta, dei u Mynsiem Bakhuid uba kren sha ki dohnud briew ban thaw thymmai ia ka jingim briew hangne ha pyrthei. Une u Mynsiem Bakhuid u pynkynduh ia ki briew shaphang ka pop ka hok haduh mynta bad ha kaba sa wan. Ngim lah ban iohi ia uta u Mynsiem Bakhuid u dang trei mynta ha sawdong pyrthei, kumba ki um ki tap ia ka duriaw.
Ka mut ba u Blei u kren ha ki briew mynta da u Mynsiem Bakhuid, bad ka long kaba shyrkhei ban ialeh pyrshah ia u Mynsiem Bakhuid jong u Blei. “Shisha nga ong ha phi, ba yn mab ia ki khun bynriew ia ki pop baroh bad ia ki jingkren bein blei. Hynrei uno uno uba kren bein ia u Mynsiem Bakhuid, un ym ioh jingmab” Markos 3:28.
Uba kren bein ia u Mynsiem Bakhuid jong u Blei yn ym mab, ha kane ka pyrthei, lymne ha kata ka ban sa wan” Mathaios 12:32.
Balei ba u Blei um mab shuh ia kita kiba kren bein ne kyntait bein ia u Mynsiem Bakhuid? Ka daw ka long ba u Mynsiem Bakhuid u long ka jingkhot kaba khadduh ia ki briew ka pyrthei ban phai na ki lynti bymman jong. Namar ynda la khang noh ne shim noh ia u Mynsiem Bakhuid na ka pyrthei te ym don jingmab shuh. kiba eh dohnud kiba ialeh pyrshah ia ka jingkhot ieit u Mynsiem Bakhuid, ki lah thikna ban poi dujok ding.
U Blei un ym kren shuh da kiba bun rukom bun bynta. Da u Mynsiem Bakhuid, dei ka jing khot kaba khadduh ia u briew sha ka jingkylla bamut bashisha namar ym don da uwei pat hadien jong u Mynsiem Bakhuid, hynrei kan wan ka jingbishar ia ki briew ka pyrthei baroh phar.
Hangne, ngi iohi ba u Blei, u long u Blei uba im uba iai khot ia ki briew sha ka jingkylla bamut, naduh ba sdang ka pyrthei haduh mynta, na ka pateng sha ka pateng u David u ong – “Naba Me long uba khraw, bad me leh ia kiei kiei kiba phylla: ME LONG U BLEI TANG MA ME HI” FOR YOU ARE GREAT AND DO MARVELOS DEEDS; YOU ALONE ARE GOD” Salm 86:10.
Sngap ia jingkhot ieit u Mynsiem Bakhuid
Sngap ia jingkhot, wat buh teng;
Wan kloi katba u dang khot ieit
Ioh ba yn lap ba khang
“Mynta u Blei, u hukum ia ki briew baroh kylleng la kylleng – BAN KYLLA KABA MUT” ki Kam Apostol 17:30.
U Blei uba Im, u kren mynta da lyngba u Mynsiem Bakhuid. Amen.