‘U Blei u shong ha jaka ba niewkor ia ki kynthei’, ong ka Deborah

Shillong, 8 Lber: 
Ryngkat ka pyrthei shi tyllup la rakhe mynta ka sngi, ia ka sngi jong ki kynthei ha ka jylla Meg halaya ruh. Ia kane ka jingrakhe la pynlong ha Sri Aurobindo Institute of Indian Culture, Shillong halor ka phang “Ka jingia ryngkat na ka bynta ki kynthei ka dei ka jing kiew shaphrang”. Ia  kane ka prokram la pynlong da ka tnad jong ka Social Welfare ka sorkar jylla ha kaba ka Myntri ka Social Welfare ka Deborah C Marak ka la long ka kongsan ha kane ka jing rakhe.
Haba kren ha kane ka sngi ka Deborah Marak ka la iaroh ia kane ka tnad kaba lapynlong ia kane ka sngi na bynta ban pyni ia ka sap kaba ki kynthei ki don.
Ka la ong ba wat la ki kynthei ha kane ka jylla la niew kor bha ia ki, hynrei ki kam thombor ki dang kynrei bha.
Ka la ong ba ki nongshong shnong ha kane ka jylla Meghalaya ki dei ki kristan, da kaba ong ba “U Blei u shong ha jaka ba niewkor ia ki kynthei”, la ong ka Deborah.
Ka Myntri ka Social Welfare ka Deborah ka la ong ba ki kynthei ki leh ia ki kam bakhia bakhia nalor ba ki ia kiam ha ka imlang sahlang nalor ki kam iing. Ka la ong ba la dei ban weng noh ia ka jingpyndonkam da ka ktien kiba tlot namar ba ki kynthei ki la jop ha kiba bun ki liang.
Ka Marak ka la kyntu ruh ba dei ban pynbha ha ka pule puthi bad ka koit ka khiah jong ki kynthei khamtam ha ki jaka nongkyndong khnang ban roi parum pareh ka imlang sahlang.
Shwa ia kane u Inspector General of Police (IGP) u  G H P Raju  u la ong ba ha ki snem 1996 kam don ju don ka jingleh kynshlein ia ki kynthei ha ka jylla Meghalaya lait noh tang katto katne ki jingshah batbor tnag. Hynrei ha kine ki sngi, ki kam shah thombor ia ki kynthei ka la kynrei bha bad u la kyntu ia imlang sahlang ba kan ban wad ia ki daw halor kine ki jingjia.
Katba ka Kong Mina Kharkhongor ka Chairperson ka State Commission for Protection of Child Rights (SCPCR) ka la kdew ia ki kyndon ka Indian Penal Code kiba iadei ban iada ia ki kynthei na ka jingshah banbein. Ka Dr. Rica Lamare na ka Project Director, Manbha Foundation ka la kren shaphang ki daw bad ka jingktah jong ka jingpyndonkam ia ki jingdih bymman.
Ha kane ka jingialang la don lang u P W Ingty u Principal Secretary ka Social Welfare Department, u T Dkhar u Commissioner bad Secretary ka Social Welfare, u Bah Himalaia Shangpliang u Director ka Social Welfare, Dr. D Kyndiah na Meghalaya State Social Welfare Board, ki nongmihkhmat na ki seng kynthei bapher bapher, na ki Aganwadis, Rangbah Shnong bad kiwei.