U Blei u isynei ia baroh

AIS SUJA

Ngi tip ba u Blei u long ka jingieit, Ioanis 4:8 bad u Blei u isynei ia baroh Rom 11:25 te dei ka jingieit bad ka jingisynei jong u Blei ia ki briew ba u la thaw ka lad ka lynti ban pynim ei ia ki briew baroh lyngba u khun jong u u Jisu khrist kein.

Dei nakata ka daw baka ktien u Blei ha ka shithi u Apostol Paul sha ki nongrome ka ong – “Namar ba ngam mon ia phi ba phin tip shaphang kane ka ka jingmaian (Mystery)… ba ka jingeh ka la jia long shiteng shiliang na ki Israel, tad ynda ka jingdap jong ki Jentil kan da ioh wan hapoh. Rom 11:25, kaba mut ba shiteng shiliang na ki Israel ki don ka jingmatlah ba kynja mynsiem ha kaba kim ithuh ia la u messiah, u ba long u Khrist u Trai. Ki Israel kim ithuh ba u Jisu u dei uta u Messiah jong ki ia u ba ki la ap khmih lynti da ki hajar hajar ki snem.

Ia kata ka jingmatlah ki Israel haduh mynta ngi iohi kumne “U la wan sha kiei kiei la ki jong hynrei kiba ki dei la ki jong kim shympdiang ia u. Ioanis 1:11. U Jisu u dei u jaid Jiw namar la kha ia u na ka jaidbynriew Jiw bad nalade hi u ong – Ba ka jingpynim ka long na ki jiw salvation is from the Jews. Ioanis 4:22. Ki Jiw ki long kiba matlah, ki ong pynban – Ia une ujisu ngi ithuh nangno u long, hynrei ynda wan uta u khrist ymdon ba tip nangno u long (Ne nangno u wan). Ioanis 7:27. Ki ong shuh shuh – U Jisu u dei u khun u Joseph, ia u kpa bad ka kmie jong u ngi ia ithuh, hato balei te u ong- Nga la wan hiar na bneng? Ioanis 6:42.

Mynta hangne ngi iohi ia ka jingmatlah ba kynja mynsiem jong ki Israel ne ki jaidbynriew Jiw, ba haba kat ia u khun u Blei u ba la wan sha kane ka pyrthei ha ka jinglong doh, pynban kim ithuh bad kim ngeit hi ruh ba u dei u ta u Khrist U Nongpynim jong ka Pyrthei uba dei u U Messiah jong ki. Kane ka buh jingeh shisha ymtang ia ki Israel hynrei wat ia u Blei ruh, namar wat haba ki iohi ki ong ba kim iohi na kadaw ka jingbymngeit. ‘

Kaba sngewtynnad hangne ka ong ka ktien u Blei, – ba tad ynda kata ka jindap jong ki Jentil kan ioh wan hapoh ynda kumta, yn pynim ia ki Israel baroh. Rom 25:26. Kaba mut tad ynda ki Jentil (Ki briew pyrthei baroh) kin ioh jingpynim kin ioh sngew ia ka Gospel u Jisu Khrist dei hangta ynkhang noh ia ka jingpynim ei ia ki da u Mynsiem Bakhuid. U Mynsiem Bakhuid mynta u dangtrei jur ha ki Ri ki Hima ka pyrthei ban pynphai ia ki briew na ka lynti ka pop. U Blei u dang pynkynduh ha ki briew da u Mynsiem Bakhuid. Hynrei ka por mynta badka ia ka jingai ei kan kut noh. yn shim noh ia Mynsiem Bakhuid nangne na pyrthei.

Kumta dei ha kum kata ka por kan long ka jingdap ne jingkut ia ki Jentil namar ba yn pynim ei pat Ia ki Israel, dei hangta kein u Nongpyllait un wan mih noh na seion (Jerusalem). Rome 11:26. Un wan mih noh na seion bad un pynphai noh ia ka jingbymriew blei u Jakob (Kaba mut u Israel). U Blei u ong – kane ka long KA JUTANG JONG NGA HA KI ISRAEL YNDA NGAN KIT NOH IA KI POP JONG KI. Rome 11:26-27. Tang shu khang ka lad ia ki Jentil (ki briew baroh) u Blei un pynim pat ia ki Jiw (Israel). U Blei un kit noh ia ki pop jong ki Israel da kata ka jingai ei (Gift) kaba khlem ka jingkylla kaba mut. Namar ong u Blei ia ki Jentil – Kumba maphi ruh phi la ju long ki bymkohnguh ia u Blei, hynrei phi la ioh jingisynei da ka jingbymkohnguh jong ki Israel. Rome 11:29-30.

Kumjuh ruh kita (Israel) mynta ki la long ki bymkohnguh bad da kata ka jingleh isynei kaba shaphi (sha ki Jentil), yn ioh leh synei ia ki Israel ruh. Balei? Namar u Blei u la set lang khop ia baroh haka jingbymkohnguh bad kumta ynioh leh isynei kein ia baroh. Kaba mut iaki Jentil bad iaki Jiw (Israel). Rome 11:32. Dei nakata kadaw – U Blei u isynei ia baroh. Ka ia kaba kut ka lad jingisynei ia ki Jentil ka long hajan. U Mynsiem Bakhuid un dang trei sa tang katto kattne hapdeng ki Jentil, namar ka long kyrkieh eh ba yn ioh pynim noh ia ki Israel ruh kat kum ki dak jong ka por, kata kam slem shuh.

U Blei mynta u dang iai khot ia ki bynriew ka pyrthei baroh sha ka miej ka jingiasuk bad u Blei u khlem pynboriano iano. Ia u bangeit yn pynim, u bymngeit u la rem lypa. Ioanis 3:18. U Blei u pynphai mynta ia ki briew da ki bun ki lad ki lynti bad ki jingjia kiba jia mynta ha pyrthei ba kin ioh wad ia ka khmat jong u namar u Blei u long ka Jingieit, bad u isynei ia baroh. Amen.