“U Blei u iohi ia ka jingshisha hynrei u ap, ki la lehbeiñ ia ngi”

Shillong,9 Nohprah:
U bah K.P Pang-niang MLA ka Rambrai Jyrngam konstitwensi bad u MDc barim katei ka konstitwensi u la ong ba ka seng Congress ka la lehbeiñ bad leh jubor ia u bad ki para MDC jong u da kaba wanrah kynsan da ka aiñ ar maloi ban dkhot jubor noh ia ka jinglong MDC jong hynrei u la ong ba u Blei u iohi ia ka jingleh jong ki bad kumta um pynslem shuh ban ai bainong ia ki, “U Blei u iohi ia ka jingshisha hynrei u ap” ong u bah K.P Pangniang haba kren sha u Rupang da ka ktien phareng kaba ju ong ‘God sees the Truth but wait’.
“Ki la lehbeiñ ia ngi hynrei mynta ka bainong jong ki, ka long ba ym donkam shuh ban ap ia ka elekshon 2018 hynrei tang ha ka elekshon MDC shiteng samoi ka seng Congress kan iaid lyngkhuit” ong u bah Pangniang haba ia kren bad u Rupang. Utei u heh ka seng HSPDP u la ong ba ka jingleh ka seng Congress da kaba dkhat jubor ia ka jinglong MDC jong u bad ki paralok jong u ka long kumba ka la tih ‘liewlep lypa ialade, “Ai ba u paidbah un ai ka jingsneng kaba tyngeh” u la ong.
U la kynthah ruh ia u kyrtong ka seng Congress ha Rambrai Jyrngam konstitwensi u Kimfa Sidney Marbaniang da kaba ong ba u dei u briew uba dang shu kha ha Rambrai konstitwensi , dang ha u snem 2013, “Dang kha ia u ha u 2013 ha Rambrai konstitwensi, lada ia khein ia ka rta jong u hangtei dang katno, u dang shu ioh rung kyrteng dang ha u 2013” ong biang u bah Pangniang.
U bah Pangniang u la ong ruh ba utei u kyrtong ka seng Congress shuwa ba un ia khun ia ka elekshon 2013 um dei satia u jait u kur Khasi bad ki kot ki sla jong u ha ki por ba u dang pule ruh um dei u Khasi hynrei shuwa ka elekshon u shu leh da ka Affidavit kaba u pynkylla jait ‘Marbaniang’ “ Ka met ruh um don ha Rambrai, ka dohnud ruh um don ha Rambrai, hynrei utei u briew u bym shym la ot sohpet ha Rambrai konstitwensi u mut ban wan pynkylla jait, wan pynkylla riti” ong u bah Pangniang.
U bah Pangniang, MLA ka Rambrai-Jyrngam bad u nongialam jong ka seng HSPDP u la kren kob ba ha West Khasi hills ki don ar tylli ki konstitwensi kiba ka seng HSPDP kan jop da kaba suk kata ha Rambrai bad ha Mawthadraishan, “Ngi la tikna ba ngin jop ar tylli, ha Rambrai lei lei shispah na ka shispah ngi la long tikna ban jop” pynkut u bah Pangniang.