U Bah Shylla u la ong ba hap siew ram, bad ka sut ia ka UDP: Jemino

Shillong, 29 Jylliew:
U Bah Jemino Mawthoh, General Secretary ka UDP, um sngew iahap ia ka jingkylla jutang noh u bah HS Shylla na ka por sha ka por da kaba kynthih na kawei ka seng sha kawei pat khlem don ka jingiai shah.
Ha ka jingiakren bad u nongthoh khubor ha kane ka sngi Balang, u Dr Mawthoh u la iathuh ba ha ka por ba u Bah Shylla u la wan pyniasoh sha UDP shwa ka elekshon MDC shiteng samoi, u la ong ba un nym mih shuh na ka UDP, namar ba u la don shibun ka jingsngew dap ram namar ba u la don teng ha kane ka party mynshwa bad u la phet biang bad u sngew kit ram ia ka party.
“Tang ka ram kaba nga hap ban siew ia ka UDP ka la bun bad sa ka sut ruh”, la ong u Bah Shylla ha ka jingiakren, katkum ka jingiathuh u Dr Mawthoh.
Hynrei ka jingkylla bad phet biang u Bah Shylla tang hadien khyndiat por ban leit kyrshan sha People Democratic Forum (PDF) ka ban kaba kylla sha ka People Democratic Front (PDF), ka la pynsngew thamula.
Katkum ka jingong u General Secretary ka UDP, ha ka jingshisha u Bah Shylla u don ka jingshemphang ha kaba iadei bad ka kam ain hynrei ka jingbym lah shah jongu, ka la ktah shibun.
“Nga iohi ba u Bah Shylla u don ka jingshemphang khamtam ha kaba iadei bad ki kam ain hynrei tang kawei ka long ba I Bah Shylla, im don ka jinglong iai shah”, la ong u Dr Mawthoh.
U la pynpaw ia ka jingsngew khia ia ka jingleh kamkai ki MDC ha KHADC haduh ba ka la I kum ka kamkai. U Dr Mawthoh u la kren halor ka jinglong lymbit ki MDC na ka liangpyrshah ban leit kyrshan ia ka EC ba ialam da u bah Pynshngain N Syiem khlem da bat ia ka rai.
Dang shen ha ka dorbar ka KHADC, lai ngut ki MDC kiba don ha ka liangpyrshah kynthup u Bah Adelbert Nongrum na KHNAM, Bah Equator L Nongrang na UDP bad u Bah Blandingstar Warjri na HSPDP, ki la kynriah biang sha ka liang ka PDF wat hadien ba ki la dep rai ban pynkhyllem ia ka EC.
Katkum ka jingong u General Secretary ka UDP, kane ka jingleh ki MDC ka la pynglong kamkai ia ka kam nongmihkhmat kaba dei ka kam iap kam im jong u paidbah.
U Dr Mawthoh u la ong ba ka jingleh ki MDC ban iamih iaphet katba mon khlem bat ia ka nongrim ka la pyntad dor hakhmat ki paidbah bad kane ka la ktah kylla wat ia ka party kaba ki don ruh.
U la ong ba ka jingjia ka kynrum kynram sain pyrthei ha KHADC ka dei ka jinglehkai danda kaba bakla kaba pyni ia ka nuksa kaba sniew bha sha ki paidbah.