Shillong:Hadien ka jingkam ba la khylliap ia ka lama Congress ha Mawsynram constituency na ka jingmih noh ki nong kyrshan ka Congress ban bud ia u bah H.M Shangpliang, myn hynnin ka sngi na ka liang ki nongialam jong ka Congress party kiba kynthup ia ka nongialam CLP ka Dr Ampareen Lyngdoh ha ryngkat u working President ka MPCC u bah PN Syiem ki la hiar ban kaweh biang ia ka lama Congress ha Mawsynram Constituency.
Ki nongialam ka Congress Party ha Meghalaya, ha ka sngi palei mynta u taiew ki la hiar sha Mawsynram ban ia don ryngkat ha ka General meeting jong ka Mawsynram Block Congress Committee, ha kaba da ka jingiadon ryngkat lang kine ki heh nongialam, ka jingialang ka la long ka ba shongshit.
Kane ka jingialang ka la long ka ba shongkun shuh shuh da ka jingwan paidbah, ki nongmih khmat na ki unit bad ki shnong bapher bapher hapoh ka Mawsynram Constituency.
La pyniaid ia kane ka jingialang da u Bah G. S. Hynniewta uba long ruh u President jong ka Mawsynram Block Congress Committee bad u Bah S. H. Kharbani u ba long u General Secretary jong ka MBCC u la ai ia ka jingkren pdiang ia baroh ki paidbah kiba la wan sha ka jingialang.
Ha kane ka jingialang la ioh ruh ban pynithuh ia ki nongkitkam jong ka Mawsynram Block Congress Committee, ka Mawsynram Mahila Congress Committee bad ka Mawsynram Assembly Unit Congress Committee, u Bah Maxwell Lyngkhoi uba long u Vice President jong ka MBCC, kumjuh ruh u nongkyrshan ba rangbah jong u Bah H. M. Shangpliang.
Haba kren ha kane ka sngi na ka liang u Bah Maxwell Lyngkhoi u la ong ba ka jingmih u Bah H. M. Shangpliang na ka Congress Party khlem da iathuh ia ki nongkyrshan ka long thik kumba u kpa ba leit wad kmie nah, namar ba um nud ban iathuh ia ka kmie bad ki khun bad kane ka long ba u mih marwei bad katto katne ngut kita kiba ong ialade ba ki dei ki nongbud ba ha khmat bad kane ka jingleh lyndet jong u ka nang pynbitar ia ki nongkyrshan jong ka party.
U la ong ruh “Kum ki nongkyrshan ki khlem poi pyrkhat ba u Bah H. M. Shangpliang un hun ban long tang kum u nongbud jong u Dr. Mukul Sangma. La long thik kum ka trailer jeep bad katto katne ngut kiba bud ia u, ki dei tang kiba shong trailer hynrei ki nongkyrshan jong ka Congress Party, kim dei kiba shong trailer hynrei kin shong skhem bad kyrshan ia u candidate ka Congress Party ha ka election ka ban sa long ha u snem 2023” u la ong.
Na ka liang u Bah P.N. Syiem ha ka jingkren jong u, u la ong ba ka MPCC ka la thung ia u Bah G. S. hynniewta ha ka 1 tarik u Nohprah 2021 katba u Bah H. M. Shangpliang u dang khot jingialang ban khylliap lama ha ka 8tarik u Nohprah 2021, bad kane baroh ka long tang ka jingleh kut lad khlem pynshong nongrim shuh, ha ka jingshisha um lah shuh ban khot ia ka meeting namar ba um dei shuh u President jong ka BCC.
U Bah P. N. Syiem u la iawer ia baroh ki paidbah ban ia trei shitom bad pynkhlain ia ka party khnang ban wanrah ia ka jingjop ha ka election ka ban wan.
Na ka liang ka nongialam ka CLP ka Dr Ampareen Lyngdoh ha ba kren ha kane ka sngi ka la pynpaw ka jingsngewnguh ia baroh ki paidbah ki ba la wan sha ka jingialang.
Ka la bynrap ruh ba u bah Shangpliang u khlem ioh jingbit na ki paidbah nongkyrshan, marwei shimet ha ryngkat katto katne ki nongbud ki la khylliap lama kaba long khlem nongrim.
“Ka jingwan her jong u bah P. N. Syiem, u bah G. S. Hynniewta bad nga ka long ban kaweh ia ka lama kum ka dak ban pynpaw sha ka pyrthei ba ki paidbah nongkyrshan jong ka Congress ki khlem khylliap lama hynrei ki dang iai kaweh ia
ka lama jong ka Congress Party” ka la ong.
Ka kong Lyngdoh ka la ong ruh ba ka jingsynshar jong ka NDA ha Central bad ka MDA ha ka jylla, ka la long shisha ka jingjynjar bad ka jingsaja ia ki paidbah nongshongshnong na ka daw jong ka jingkiewdor ki mar bam bad kiwei kiwei kham tam eh ka jingbym lah jong ka Sorkar MDA ban shakri ia u paidbah ha ka por u COVID-19.
U samla C Syiemlieh uba long u President jong ka Assembly Youth Congress u la kyntu ia ki paidbah ba kim dei ban shah pynbiej ha ka Sorkar NDA bad MDA kiba ha kaba kut kin khniot ia ka ioh ka kot jong ki paidbah nongshongshnong jong ka jylla.
Ha kane ka jingialang la ioh ia ka jingai khublei na u Bah G. S. Hynniewta kum u President jong ka MBCC uba la pynpaw ia ka jingsngewnguh ia baroh ki paidbah kiba la ia wan ban don ryngkat ha ka jingialang wat ha ka jingpyntip ka ba khynniat por ,kumjuh ruh u la pynpaw ka jingsngewnguh ia u Bah P. N. Syiem bad Kong Ampareen Lyngdoh, kiba la ia wan ban pynshngain bad ai mynsiem ia ki nongkyrshan jong ka Congress Party ha Mawsynram.
Nang kiew irat Seng Congress