Shillong: Ka sain pyrthei ha Khasi Hills Autonomous District Council (KHADC) ka lah ban khih biang ban pynkhyllem ia u Chief Executive Member (CEM) u Bah Pynshngain N Syiem uba la lait im bunsien na ka jingshah pynkhyllem ha kine ki sngi ba la dep.
U Bah James Sylliang, MDC haba kren sha ki kotkhubor, ha ka Sngi Palei:Wlytan
Mynta, ka jingkhih ban pynkhyllem ka mih ym dei shuh na ki MDC liangpyrshah hynrei na u MDC uba dei na kajuh ka seng PDF syndon.
U MDC ka PDF na Mawhati u Bah James Sylliang, uba la shah pynhiar shuki Executive Member (EM) dang shen, ha u Bah Pynshngain N Syiem, u la iawer ia kiwei ki MDC ba kin iasoi lang ban khot da ka dorbar kyrpang jong ka Council khnang ban iatai ia ka jingpyndonkam ia ka pisa kaba T. 28 klur, kaba la kynnoh ba u Bah Pynshngain u la leh nongsynshar donbor ban klun lut hi marwei khlem kano kano ka jingtip lang jong ka Executive Committee.
Ha ka jingkren sha ki nongthoh khubor mynta ka sngi, u Bah James Sylliang ula kynnoh ba u Bah Pynshngain ula klun lut ia ka pisa jong ka Council kaba T. 28 klur na ka T.33 klur khlem kano kano ka jingiakren ne iasyllok ha ka Executive Committee.
“U Bah Pynshngain um dei u hero ka jaitbynriew hynrei u hero ka dual post namar ba u la jop tang ia ka kam shimet lajong, hynrei ym pat don kawei ka kam ba u la leh ia ka jaitbynriew”, la ong u MDC ka Mawhati.
Kane ka jingmih madan u Bah James Sylliang ban ther ia u CEM, ka la long hadien ba u la shah pynhap shuki EM dang shen.
“Nga ruh ngam tip ba u CEM u la leh donbor ia ka T.28 klur na ka T.133 klur ba ioh na ka sorkar pdeng ban pyntreikam ia ki kam pynroi sha ki konstitwensi, hynrei nga tip hadien ba ki MDC ka HSPDP bad ka UDP bad ka Congress ki la leit ban thap miej ha kamra jongu (CEM)”, la ong u Bah James.
U la ong ba ka Council ka donkam kyrkieh ban don ka dorbar ba kyrpang na ka bynta ban iatai ia ki kam leh donbor jong u CEM ia ka pisa kaba T.28 klur bad lada poi u pud shaduh ban pynkhyllem noh ia u ruh, kampher.
Katkum ka jingong u MDC ka Mawhati, ka daw ka jingshah pynhiar shuki jong u, ka dei namar ba ma u, lem bad lai ngut kiwei ki MDC ba kynthup u Bah Latiplang Kharkongor, Bah James Ban Basaiawmoit bad ka Kong Grace Mary Kharpuri, ki la iasoi ia ka shithi, kaba ki la thoh sha u president ka PDF ban khot noh da ka jingialang kaba kyrkieh na ka bynta ban iakren ia ka kam CEM hadien ba u Bah Pynshngain u la tyrwa ban iehnoh ia kane ka kam.
Ha ka shithi, kine saw ngut ki MDC ka PDF ki la dawa ba dei ban khot noh ia ka jingialang ha ka 10 tarik Iaiong ba la dep, ban iapyrkhat ia ka kam CEM, kumba la dep iakren ha ka jingialang ka party kaba long ha ka 3 tarik Iaiong, khnang ba kan nym long kamkai.
“Ngi la thoh sha ka shithi ba u president u dei ban khot noh ia ka jingialang kumba la iakren ha ka jingialang shaphang ka kam CEM hadien ba u Bah Pynshngain u la tyrwa ban risain noh”, la ong u Bah James.
U Bah James u la ong ba dei na kane ka daw, ba u Bah Pynshngain u la sngew thut bad ha jaka ban khot ban iakren, u la weng noh ia u na ka shuki.
U la kynnoh ba shwa ia kane, u Bah Pynshngain u la dep knieh noh ia ki tnad ba bat ki Executive Member kynthup ka tnad ba bat ma u, khlem kano kano ka jingïasyllok ne ka jingiakren shi kyntien ruh.
“U CEM u la leh donbor ruh da kaba knieh ia ki tnad ba bat ki EM khlem kano kano ka jingiasyllok wat tang shi kyntien ruh”, la kynnoh u Bah James bad bynrap, “ia ki phail ba la dep mynjur bad soi da ma u, ruh u CEM u dang pan biang bad pynkylla bad don ki kam ba la dep ai ia ki kam ha ki briew ruh, u weng bad phah pynphai biang ia ka pisa ba ki la thep”, la kam u Bah James.
U MDC ka Mawhati, u la ong ha ka jingshisha, u la don ka jingthmu ban risain noh ia ka kam EM namar ba um sngew iahap shuh ia ka jingshah leh donbor hynrei lah kloi noh u Bah Pynshngain ban weng.
U la ong ba ha ka por ba u Bah Pynshngain u la tyrwa ban iehnoh ia ka kam CEM, la kyrpad ba un bat shwa haduh ban wai ka dorbar namar ba lada un risain noh shwa ban sdang ka dorbar, ka jingeh ka long mano ban ai jubab ia ka jingpynlut ia ka T. 28 klur.
U la iathuh ba ha ka jingialang kaba long ha ka 3 tarik Iaiong, la don ka jingtyrwa ban shimti nongialam ne CEM da u Bah Latiplang Kharkong ba la tyrwa da u Bah James Ban Basaiawmoit hynrei u Bah Pynshngain u la pyneh ba dei ban shimti CEM u Bah LG Nongsiej bad dei hangne ba khlem pat lah rai satia.
U la ong ba mynta un leit ban iasyllok bad ki MDC ban iasoi paidbah ban khot ia ka dorbar kyrpang jong ka Council ban iakren ia ka T.28 klur kaba la leh donbor jong u Bah Pynshngain bad ha kane ka dorbar, lada donkam wat ban weng noh syndon ia u na ka shuki CEM. Katkum ka rule, ban khot dorbar kyrpang ka donkam ban ioh ia ka jingkyrshan bad ka jingsoi jong ki 20 ngut ki MDC ha ka ing kaba don 30 ngut.
Wat ha ka por ba thaw ia ka People Democratic Alliance (PDA) ba iadon lang ka UDP, HSPDP, PDF ruh um shym la wanrah ban iakren hynrei la shu leh hi marwei da ka jingsngew bit jongu.
U la ong ba lada kito ki MDC khamtam ka HSPDP, UDP kiba ju rah da ka No Confident motion ban pynkhyllem ia u Bah Pynshngain bad kumjuh kiba la tied miej halor ka jingleh donbor jongu ia ka T. 28 klur, kim kyrshan ban khot ia ka dorbar kyrpang, ka mut ba ki iadon bynta lang.
Ha kajuh ka por, u la ong ba um nym phet na ka PDF hynrei u kwah ban iashai shwa bad dei hadien kata, ba yn sa peit kaei kaba dei ban leh, lah ban dang neh ne em ha ka PDF.
Lah ban kdew ba dang shen, u Bah Pynshngain u la thep Deputy CEM ia ka Kong Teilinia Thangkhiew ka HSPDP bad ka kam EM ia u Bah Donkupar Sumer ka UDP hadien ba u la thaw ia ka PDA bad u la pynhap shuki noh ia u MDC ka Mawhati.
Ki MDC ka UDP bad ka HSPDP kiba ther tyngeh ia u Bah Pynshngain ia ka T.28 klur ha ka dorbar ba la dep, hynrei mynta ki la iadon lang ha kane ka kynhun PDA.