“U Bah Pynshngain u iakhun katkum ka ain, u Mukul u thom da ka bor”

Shillong, 06 Naiwieng:
U Nongialam ka BJP ba peit ia ka Meghalaya u Nalin Kohli u la ther ia ka rukom synshar bad leh donbor jong ka sorkar Congress kaba synshar ha ka jylla khamtam ban noin bad thom da ka bor ia ka KHADC hapoh ka jingialam u CEM Bah Pynshngain N Syiem.
Ha ka jingiakren sha ki nongthoh khubor ha kane ka sngi Saitjain ha nongbah Shillong, u Kohli u la ong, “Ka Sorkar jylla ba ialam da u Myntri Rangbah u Dr Mukul Sangma, ka la thom da ka bor ka sor ban leh jubor ban thung nongpyniaid ia ka dorbar jied chairman ka KHADC, khlem da iaid katkum ki kyndon ka 12 (1) ka Meghalaya Assam Autonomous District Council Rule 1951, kaba ong ba ia ka kam Chairman bad Deputy chairman ka KHADC dei ban jied napdeng ki dkhot (MDC) ban pyniaid ia ka dorbar, ym ban thung da uwei bym dei u MDC”. Kane ka jingkynthah u Kohli ka long hadien ba ka sorkar jylla lyngba ka tnad District Council ka la phah ia ka kyrteng jong u Deputy Commissioner ka East Khasi Hills u Bah Peter S Dkhar ban leit pyniaid iaka dorbar jied chairman ha KHADC.
“U Myntri Rangbah u dei ban dang leit shah hikai ain ha u samla pule ain”, la ong u Kohli, bad bynrap, ba u Myntri Rangbah bad ki synran myntri jong u, ki la pyrshang da ka bor khlem peit shuh ia ki kyndon ka ain, ki rul ban thom da ka bor ha KHADC .
“U Bah Pynshngain uba shah sospon ha ka Congress, u la iakhun da ka lynti katkum ka ain, katba ka sorkar u Dr Mukul ka iakhun da ka bor khlem iaid katkum ki ain. ki kwah ban knieh ia ka bor khlem iaid katkum ki ain”, la ong une u nongialam ka BJP uba dei ruh u nongsaid ain ha Supreme Court.
U Kohli u la ong ba kane ka jingpyrshang dohiap u Myntri Rangbah ban thom da ka bor, ka long namar ba hadien ba ka Congress ha kane ka jylla ka la ring swai namar ba ki paidbah ki la ai ia ka jubab ha ka elekshon MDC ha GHADC, ha ka elekshon shiteng samoi ka MP ha Tura ba la dep. “Mynta ki la pyrshang ban leh da ka bor namar ba ka don ka elekshon MDC shiteng samoi ha ki7 tylli ki jaka ha KHADC bad kawei ha JHDAC”, ula ong.
Na ki dak ki shin, ka paw shai ba ki paidbah ka Meghalaya ki la thait bad ngiah ia ka Congres bad bun ki nongialam, ki nongkyrshan jongka, ki sngew ba ym don jingkyrmen shuh ban dang iai don ha kane ka jhad kaban sa ngam noh shen ha duriaw.
“Nangne shakhmat, ka jingniew sngi ka la nang iaid ha kaba bun ki nongialam ka Congress kin sa wan ban iasoh shuh shuh bad ka BJP namar kim sngew shngain shuh ban shong ha ka jhad kaban sa ngam jyllop noh shen”, la ong u Kohli.