U Bah Pynshngain u bat suloi ar ktang um nang pyndonkam: Shylla

Shillong, 28 Iaiong:
U Bah HS Shylla u la kyntait ban pdiang ia ka jingong ba u Bah Pynshngain u dei u Hero jong ka jaitbynriew. Katkum ka jingong u Bah Shylla, u Bah Pynshngain um jop wat tang iwei ruh i mat jong ka jaitbynriew kynthup ka jingskud jaka ka Meghalaya Urban Development Authority (MUDA), ka sah umdum ka Village Administration Bill bad kiwei.
“Ha ka jaka ba shong basah ki matlah; u briew uba leh shiliang khmat ruh la thung kum u syiem”, la ong u Bah Shylla haba kren mynta ka sngi.
Kaba u Bah Pynshngain u jop ka long beit tang ia ka kam shimet bad kata ka long ka kam bat ar maloi kum u MLA bad MDC. U la ong ba tang namar ba u ialeh pyrshah ia u Myntri Rangbah u Dr Mukul Sangma, la pynlong hero ka bym don eiei hynrei tang ka politik suda.
U la ther ba u Bah Pynshngain u la bat ia ka suloi ar ktang kata kum u MLA bad MDC hynrei kaba sngewsih ka long ba um nang ban pyndonkam ia ka haduh ba ka MUDA ka la iaid skud sha ki jaka ka 6th schedule.
“U Bah Pynshngain u bat da ka suloi ar ktang (MLA/MDC) hynrei u khlem nang ban pyndonkam ia ka”, la ong u Bah Shylla.
U la ong ba katkum ka Meghalaya Town and Country Planning Act 1978, ka la kren sha ba ka sorkar jylla kam lah ban pyntreikam ia ki ain jongka ha ki jaka ba hap hapoh u pud u sam ka district council khlem da ioh ia ka jingmynjur jong ki district council.
Hynrei namar ka jingbiej jong u nongialam ka KHADC u Bah Pynshngain ka la MUDA ka la kyntur pud haduh kine ki sngi.
“Kaba jop u Bah Pynshngain ka dei tang ka kam shimet jongu, kata ban bat kam ar maloi kum u MLA bad MDC’, la ong u Bah Shylla.