Shillong: U Chief Executive Member (CEM) ka KHADC u bah HS Shylla u la ong ba u myntri rangbah ba-ar ka jylla u bah Prestone Tynsong um pat sngewthuh satia ia ki kam jong ka District Council. U bah Shylla u la ong ba u bah Prestone u la leit ialap elekshon ha kine ki sngi bad u kam ba lada ka NPP kan ioh ban thaw Executive Committee ha KHADC hadien ka elekshon MDC kan pyntreikam noh ia ka Village Administration Bill (VAB).
“Kumno kin pyntreikam ia ka VAB haba jan baroh ki Hima mynta ki la don la ki jong ki aiñ kiba la buh jingthoh lait noh tang khyndiat ki hima ki bym pat don, kane ka pyni ba u bah Prestone um pat sngewthuh ia ki kamram jong ka District Council” ong u bah Shylla. U bah Shylla u la ong ruh ba lada pyntreikam ia ka VAB kan iatyngkhuh ka Village Development Council bad ka bor jong ki dorbar shnong. U la ong ba ka jingpynlong mat elekshon ia ka VAB ka pyni shai ba ki nongialam ha kane ka jylla kim don jingkitkhlieh ia ki jingbha jingmiat jong u paidbah.
U CEM u la kynthoh ruh ia u nongialam ka UDP u bah Bindo M Lanong ha kaba u la ong ba u bah Bindo u la kren ba lada ka UDP kan wan ha ka bor kan pynkut noh shisyndon ia ka jingthung Acting Syiem ha ki Hima. U la pynkynmaw ba ha ka por ba u bah Bindo u long CEM ki paidbah ki jynjar bha naba um ju biang por bad u poi slem sha ophis bad haba ki leit ban iakren ia kino kino ki kam u phah ba kin batai lyngkot namarba um don por bad wat ia ki nongiasaid aiñ ruh u la ong ba ki dei ban batai lyngkot ym ban pynjrong ba um don por ban sngap. “Kumno phin sngewthuh ia ka jingeh ki paidbah lada phim sngap bha, kumno ki nongiasaid aiñ kin batai lyngkot ia ki kes” ong u bah Shylla.
Phi don ban ong eiei?