Shillong, 14 Nohprah:
U Chief Executive Member ka KHADC u bah Pynshngaiñ N Syiem u la kynthah ia ka jingkren jong u bah Prestone Tynsong bad kumjuh ruh u bah HDR Lyng doh kiba la ong ba ka sorkar kan pynlong ia ka elekshon MDC shiteng samoi hapoh ka hynriew bnai bad kumjuh ruh kiba la ong ba ia u MDC shu sieh ka dei ka kamram jong ka sorkar ban jied ia u briew “Ki la shu kren khlem da kdew ia ki kyndon Aiñ aiu ba ki kren,ngi iaid katkum ki Rules ki pat ki kren khlem aiñ khlem rule” ong u bah Pynshngaiñ uba la bynrap ruh ba donkam ia ki haba ki kren ki dei ban kren ryngkat ki kyndon Aiñ.
Haba la kylli ia ka elekshon shiteng samoi ka KHADC u bah Pyn shngaiñ u la ong ba ka shong ha ka District Council ban pynpaw ia ka jingsngew donkam jong ka ban pynlong ia ka elekshon shiteng samoi. Haba la kylli pat un leh kumno lada u Lat un pynbna elekshon kham tam ba na ka liang ka Congress kaba bat ia ka bor synshar ka la khot aplikeshon shaid shaid na ka bynta katei ka elekshon u bah Pynshngaiñ u la ong “Mano ba phah ia kita ki MDC ban risaiñ, lada pynlong elekshon ruh ngim shah ia ka sorkar ba kan ktah ia ka bhah pisa jong ka District Council namarba ngi ruh ngi ha la ki jong ki kam ban pynlut ia ki pisa ba wan na ka sorkar” u la ong biang. U la iathuh ruh ba dang shen ha kine ki sngi u la ioh shithi na u President ka MPCC u ba la ong ia u ba u dei ban iaid ryngkat ryngkat bad ka Party khamtam ha kaba ia dei bad u MDC shu sieh, hynrei u la ong ba u la phah ia ka jubab halor katei ka shithi ruh ha kaba u la ong ba ha District Council ki don 10 ngut ki Congress katba 11 ngut ki MDC pat kiba ia donlang ha ka liang synshar kim dei ki Congress, bad u la ong ruh ba u pyntip ba u hap ban iaid katkum ka jingdonkam ban iaid ha ka sorkar synrop.
Lah ban kdew ba kham mynshuwa u bah Pynshngaiñ u la ong ba u la dep ban ia kren bad u Lat ba shuwa ba un pynbna ia ka elekshon shiteng samoi ha KHADC u dei ban ia phylliew jingmut shuwa bad ki bor ka district Council namarba kumba long mynta ka District Council ka don hapdeng ka jingkyrduh pisa bad haba pynlong elekshon u la ong ba dei ka District Council hi ka ban tip ia ka jinglut jingsep baroh
Phi don ban ong eiei?